Ծառուկյանի դեմ պայքարելու փոխարեն, լավ կլինի Ա. Թորոսյանը իր անմիջական գործառույթներով զբաղվի. Ի. Տոնոյան

«Այս ամենը վատ բեմադրված տրագիկոմեդիա է հիշեցնում: Ես ցավ եմ ապրում, որ մեր երկրի առողջապահության նախարարը ուրիշ ավելի կարևոր գործ չունի, քան ասենք ֆոտոշոփով սարքած ինչ-որ թղթի հրապարակումը»,-ասաց Իվետա Տոնոյանը:

Վերջինս նշեց, որ հիշատակված Վազգեն Պողոսյան անունով անձը 20415-ից այլևս ԲՀԿ կուսակցության անդամ չէ, 2012թ-ին է մեծամասնական ընտրակարգով առաջադրված եղել, և նրա բնակարանում խուզարկության արդյունքում են ինչ-որ ուղթ գտել, որի վրա թվեր են գրված:

«Որևէ ստորագրություն, կնիք, պարոն Ծառուկյանի հետ կապ ունեցող որևէ բան չկա»,-ասաց Իվետա Տոնոյանը: Նա նշեց նաև, որ ծանոթ չէ ԱԱԾ հայտարարությանը, կծանոթանա, հետո նոր կմեկնաբանի:

Իվետա Տոնոյանը տեղյակ չէր, թե արդյո՞ք ԲՀԿ առաջնորդի տնից ինչ-որ բան տարել են թե՞ ոչ, սակայն ասաց, որ իրենց Գեղարքունիքի կառույցի ներկայացուցչի երեխայի հեռախոսն են առգրավել:

«Կրկնում եմ, ես ԱԱԾ հայտարարությանը ծանոթ չեմ, և կներեք, «Հայկական ժամանակի» հրապարակումները, որ հղում են անում իրենց տեղեկություններին…Ես իհարկե, հասկանում եմ, որ «Հայկական ժամանակը» վաղուց դարձել է իրենց պաշտոնական խոսափողը, բայց ինձ համար իրենց հրապարակումը պաշտոնական հաղորդագրությու չէ: Մենք հիմա երկու տարբեր բաների մասին ենք խոսում»,-նշեց Իվետա Տոնոյանը:

Պատգամավորը տարակուսեց, որ իրավապահների այս խուզարկության համար հիմք է հանդիսացել իրենց հայտնաբերած փաստաթղթի վրա գրված «Գագիկ Ծառուկյանի» հանձնարարությամբ» արտահայտությունը:

«Ես էլ ասացի՝ կարող են գրել Գագիկ Ծառուկյանի հանձնարարությամբ Արման Աբովյանը սպանել է Քենեդուն, օրինակ… Դե թող ԱՄՆ համապատասխան մարմինները գան Արման Աբովյանի բնակարանը խուզարկեն կամ ձերբակալեն»,-ասաց ԲՀԿ խոսնակը:

Վերջում Իվետա Տոնոյանը մեկ անգամ էլ անդրադարձավ առողջապահության նախարար Արսեն Թորոսյանին, ով, պատգամավորի խոսքով, իր բանու գործը թողած, առավոտ կանուխ սկսում է այդ փաստաթղթերը հրապարակել:

«Լավ կլիներ, որ առողջապահության նախարարն իր անմիջական գործառույթներով զբաղվեր, ու կորոնավիրուսի դեմ պայքարի գործընթացի փոխարեն Գագիկ Ծառուկյանի կամ ընդդիմության դձեմ պայքարելով չզբաղվեր, որովհետև բոլոր մահերի համար իրենք են պատասխան տալու»,-եզրափակեց Իվետա Տոնոյանը:

Նշենք որ ՀՀ առողջապահության նախարար Արսեն Թորոսյանը ֆեյսբուքյան իր էջում փաստաթուղթ է հրապարակել և կից գրել է. 

«Հետաքրքիր է ինչ կասեն մեր հայրենակիցները սոցիալական մեդիայում հայտնված այս «փաստաթղթի» մասին: Արդյո՞ք այսպես չեն տարիներով կեղծվել ընտրությունները և «գնվել» մեր հայրենակիցների ձայները:

Օրինականության հաստատումը քաղաքական հետապնդում կոչողներն էլ հավանաբար ինքնապաշտպանության համար են դա անում: Միգուցե՞ կան նման փաստաթղթեր, որտեղ կան նաև իրենց անունները:

Վստահ եմ, որ ԱԱԾ-ն և մյուս իրավապահ մարմինները մինչև վերջ կքանդեն այս կծիկը և բոլոր, անխտիր բոլոր մեղավորները կստանան օրենքով սահմանված իրենց պատիժը»: