Ադրբեջանը Նախիջևանի ուղղությամբ լուրջ սրացման չի գնա. քաղաքագետ

Կովկասի ինստիտուտի տնօրեն Ալեքսանդր Իսկանդարյանի կարծիքով` Ադրբեջանում, որպես այդպիսին, ոչ մի ընտրություն էլ տեղի չի ունենում: «Ընտրությունն այն է, երբ գործընթացը հայտնի է, արդյունքները` ոչ, իսկ նրանց մոտ հակառակն է` բոլորն էլ հասկանում են, թե այնտեղ ով կլինի նախագահ»,- նշեց նա:

Ըստ քաղաքագետի` Ադրբեջանում գոյություն չունի քաղաքական ընդդիմություն, Ադրբեջանն այն երկիրն է, որտեղ ֆեյսբուքյան գրառման համար մարդիկ բանտ են նստում, այդ երկրում քաղաքական հռետորությունը գրեթե ոչնչացված է:

Իսկանդարյանի կարծիքով` այս ընտրություններից հետո որևէ փոփոխություն չարժե սպասել Արցախյան հակամարտության կարգավորման հարցում: «Արցախյան խնդիրը կմնա այնպես, ինչպես հիմա է. Մինսկի խմբի համանախագահ երկրները կշարունակեն աշխատել ստատուս քվոն պահպանելու ուղղությամբ, Հայաստանն ու ԼՂՀ-ն կշարունակեն աշխատել զինված ուժերի կատարելագործման ուղղությամբ, Ադրբեջանը դուրս չի գա բանակցային գարծընթացից, կհամատեղի այդ գործընթացը ժամանակ առ ժամանակ սահմանին տեղի ունեցող սրացումների հետ և այլն»,- ասաց նա:

Ըստ քաղաքագետի` այն, ինչ այսօր կատարվում է սահմանին, օրինաչափ է, քանի որ դա Ադրբեջանում կայացված ռազմավարական որոշում է: «Այդ ռազմավարությունը երկարաժամկետ է, հարցական է միայն այն, թե որքան հաճախակի և որքան ուժեղ կլինեն այդ սրացումները, որքանով սահմանային դեպքերը կնվազեն կամ կավելանան»,- ասաց նա:

Խոսելով օրեր առաջ նախիջևանյան հատվածում իրավիճակի սրման մասին` Իսկանդարյանը կարծիք հայտնեց, որ Ադրբեջանը Նախիջևանի ուղղությամբ լուրջ ռազմական գործողություններ չի ձեռնարկի: «Ադրբեջանի ռազմական բյուջեն 3 անգամ նվազել է, ապրիլյան պատերազմի ժամանակ կորցրել են հատուկջոկատայինների կեսին, իսկ նոր հատուկջոկատայինների պատրաստումը թանկ հաճույք է: Ադրբեջանում բազմաթիվ խնդիրներ կան, այդ թվում` սոցիալական, տնտեսական»,- նշեց նա` հավելելով, որ դրանից է կախված, թե ինչպես կզարգանա իրավիճակը սահմանին:

Համեմատելով նախորդ տարվա սահմանային լարվածության հետ` Իսկանդարյանը նշեց, որ այս տարի սահմանին կորուստները նվազել են: