Նախիջևանի համար պատասխանատվություն ունի Ռուսաստանը՝ որպես Կարսի և ռուս-թուրքական պայմանագրերի հեղինակ. քաղաքագետ

Օրերս ԳԱԱ արևելագիտության ինստիտուտի տնօրեն Ռուբեն Սաֆրաստյանը հայտարարել էր, որ Թուրքիայի ակտիվությունը Հարավային Կովկասում վերջին մեկ տարվա ընթացքում Նախիջևանի ուղղությամբ է, ինչը և' քաղաքական, և' ռազմական նշանակություն ունի: Մասնավորապես` Թուրքիան նախապատրաստվում է իր սահմաններից դուրս ստեղծել  երրորդ ռազմաբազան:

«Օգտվելով այն հանգամանքից,  որ ՌԴ-ն ունի իր կարիքը Սիրիայում, Թուրքիան փորձում է իր ոտքի տեղը մի քիչ ընդլայնել և ուժեղացնել իր ներկայությունը Նախիջևանում, այդ թվում՝ ռազմական առումով: Սա աշխարհաքաղաքական կարևոր գործընթաց է, և չեմ կարծում, որ այն ռուսների կողմից լուրջ հակազդեցության չի արժանանա, քանի որ սա առաջին հերթին արվում է ՀՀ-ում ռուսական ռազմաբազայի գոյությանը հակակշռելու նպատակով»,- ասել էր թուրքագետը:

Այսօր լրագրողների հետ զրույցում անդրադառնալով Թուրքիայի կողմից Նախիջևանի հատվածում երրորդ ռազմաբազայի ստեղծմանը` քաղաքագետ Ալեքսանդր Մանասյանը նշեց. «Այստեղ պետք է սպասել ռազմավարական դաշնակից Ռուսաստանի քայլերին, որը դեռ լռում է, մինչդեռ Նախիջևանի համար պատասխանատուներից է նաև Ռուսաստանը, քանի որ Կարսի պայմանագրի տակ, ինչպես նաև ռուս-թուրքական պայմանագրի, առկա  է Ռուսաստանի ստորագրությունը,  և այդ պայմանագրերով, որտեղ կա նաև մեր ստորագրությունը, Ռուսաստանը պատասխանատվություն ունի: Ինչ վերաբերում է մեզ, ապա մենք պետք է բարձրացնենք Թուրքիայի սահմաններից դուրս՝ հետխորհրդային տարածքում, թուրքական ռազմաբազայի հարցը: Այդ ռազմաբազայով Թուրքիան մեծացնում է իր ռազմական ներկայությունը, նրանք վարպետ են և ճիշտ պահ են ընտրել.  սա անում են ՌԴ-ի հետ իրենց սիրախաղերի պահին, որ Ռուսաստանը չխոսի, քանի որ ներկայում Ռուսաստանը շահագրգռված է Թուրքիային պոկել արևմտյան աշխարհից»:

Ըստ քաղաքագետի՝ այստեղ անելիք ունի նաև Իրանը: