Մարտի 24-ին նիստ է նշանակված, բոլոր հարցերը կքննարկենք. Մկրտչյանը` Շիրակի համալսարանի դասախոսների հեռացման մասին

ԿԳ նախարար Լևոն Մկրտչյանն այսօր խորհրդարանում լրագրողներին ասաց, որ մամուլից է իմացել, որ Շիրակի պետական համալսարանի երկու դասախոս՝ Գագիկ Համբարյանն ու Հովհաննես Խորիկյանը, ազատվել են աշխատաքնից:

Նախարարը տեղեկացրեց, որ մարտի 24-ին նշանակված է համալսարանի գիտխորհրդի և կառավարման խորհրդի համատեղ նիստ, որի ընթացքում էլ կքննարկեն բոլոր հարցերը: «Ես տեղյակ չեմ եղել, որ ԱԺ պատվիրակությունը գնացել է Գյումրի: Եթե իմանայի, 24-ին համատեղ կգնայինք, որովհետև իսկապես բարդ իրավիճակ էր: 24-ին կնայենք բոլոր խնդիրները»,- ասաց նա:

Մկրտչյանը նշեց, որ այդ դասախոսներն անընդհատ իրեն են մեղադրում: «Այդ երիտասարդներն անընդհատ ինձ մեղադրում են: Փորձում եմ չներքաշվել այդ խնդիրների մեջ, բայց, ի վերջո, մենք պետք է հասկանանք, որ համալսարանն ինքնուրույն միավոր է, ունի կառավարման խորհուրդ, գիտական խորհուրդ»,- ասաց նա:

Մկրտչյանը հիշեցրեց, որ նմանատիպ խնդիրներ այլ բուհերում էլ են եղել, օրինակ` Գորիսում:

Նախարարի խոսքով՝ այդ բողոքների հիման վրա Շիրակի համալսարանում ստուգում են անցկացրել: «Մանրամասն ստուգումներ են իրականացվել: Այլ խնդիր է ազատել- չազատելը, այլ խնդիր՝ լուրջ մեղադրանքների բլոկը»,- ասաց նա:

Նա նաև տեղեկացրեց,  որ ընդլայնված նիստում քննարկվելու են համալսարանում իրականացված աուդիտի արդյունքները, դա կլինի հրապարակային: