Կքննարկենք և մեր վերջնական կարծիքը կասենք. Բաբլոյանը՝ պարտադիրի մասին

Երբ նախագիծը գա Ազգային ժողով, կքննարկենք և մեր վերջնական կարծիքը կասենք. խորհրդարանում լրագրողների հետ զրույցում ասաց ՀՀ ԱԺ նախագահ Արա Բաբլոյանը՝ անդրադառնալով հուլիսի 1-ից ուժի մեջ մտնող կենսաթոշակային համակարգի պարտադիր բաղադրիչին։

«Ես չեմ ուզում կարծիք ասել, որպես Ազգային ժողովի նախագահ, որպեսզի չունենամ ազդեցություն»,- հավելեց նա:

Հարցին՝ այս համակարգն իրենց իշխանության օրոք է ներդրվել, արդյո՞ք կաջակցեն, որ ընդունվի, Բաբլոյանն արձագանքեց. «Կքննարկենք, կորոշենք»:

Նշենք, որ նախագծով առաջարկվում է կուտակային պարտադիր համակարգին մասնակցող և հուլիսի 1-ից դրան միացող քաղաքացիների եկամտի 10 տոկոսի կուտակումը ձևավորել 2.5 և 7.5 տոկոս համամասնությամբ, այսինքն` 2.5 տոկոսը կվճարի քաղաքացին, 7.5 տոկոսը` պետությունը:

Դեռևս գործող կարգավորմամբ` կենսաթոշակային համակարգի մասնակիցը կուտակում է իր եկամտի 10 տոկոսը՝ 5 տոկոսը վճարում է անձը, 5 տոկոսը՝ անձի օգտին` պետությունը: