Սուրբ Հարության տաճարի դռներն այսօր էլ փակ կմնան. Երուսաղեմի հայոց պատրիարքարանի դիվանապետը՝ բողոքի ակցիայի մասին

Կիրակի ժամը 12:00-ից Երուսաղեմի Սուրբ Հարության տաճարի դռներն առ այս պահը փակ են՝ ի նշան բողոքի: Yerkir.am-ի հետ զրույցում Երուսաղեմի հայոց պատրիարքարանի դիվանապետ Կորյուն վարդապետ Բաղդասարյանը հայտնեց, որ վաղը մինչև կեսօր քրիստոնյա համայնքների հոգևոր հովիվների հանդիպում է նախատեսված: «Մինչև հանդիպումը եթե քաղաքապետարանը և Քնեսեթը չչեղարկեն իրենց որոշումները, ապա հանդիպման ժամանակ հոգևոր հովիվները պետք է քննարկեն իրենց հետագա քայլերը»,- հայտնեց Կորյուն վարդապետ Բաղդասարյանը:

Նա տեղեկացրեց, որ երկու որոշում կա, որը ստիպել է իրենց գնալ նման քայլի` փակել տաճարի դռները: «Երկու որոշում կա: Քաղաքապետարանի որոշումով հրահանգված է հարկեր գանձել եկեղեցիներից և վանքերից: Կա նաև Քնեսեթում շրջանառվող մի օրինագիծ, որով այն բոլոր եկեղեցիները, որոնք ունեն կալվածքներ և կփորձեն իրենց կալվածքները պետության կողմից չճանաչված ընկերություններին վարձակալության տալ, այդ դեպքում կալվածքի տնօրինման իրավունքն ամբողջությամբ անցնում է պետությանը»,- ասաց վարդապետը:

Նրա խոսքով` իրենց պահանջն է, որպեսզի այս օրինագիծը շրջանառությունից դուրս գա և չստանա օրենքի ուժ: Նման օրինագծերը, ըստ Կորյուն վարդապետ Բաղդասարյանի, պայմանավորված են նրանով, որ, 2010 թվականից սկսած, Երուսաղեմի հունաց պատրիարքարանը մի քանի նոր պայմանագրեր է կնքել անհատ ձեռներեցների կամ ընկերությունների հետ: «Հիմնականում պատրիարքության կնքած այդ պայմանագրերն են պատճառ դարձել, որ նման օրինագիծ է դրվել շրջանառության մեջ: Հստակ ասվում է, որ այս օրենքը պետք է տարածվի 2010 թվականից ստորագրված կալվածքների վրա»,- նշեց նա:

Կորյուն վարդապետի հաղորդմամբ` օրինագիծը նոր չէ, որ դրվել է քննարկման: «Այդ օրինագիծը 7-8 ամիս է` մշակվել և ներկայացվել է: Հիմա հանձնաժողովներում է քննարկվում, որպեսզի հանձնաժողովները տան իրենց եզրակացությունը, և ըստ այդմ` օրինագիծն անցնի Քնեսեթի լիագումար նիստ»,- եզրափակեց նա: