Գնաճի մեր թվերը տարածաշրջանում լավագույնն են. վարչապետ

Այսօր ԱԺ հերթական նիստում կառավարության հետ հարց ու պատասխանի ժամանակ ՀՅԴ խմբակցության պատգամավոր Արմենուհի Կյուրեղյանը հարց ուղղեց կառավարությանը հարկային նոր օրենսգրքով ուժի մեջ մտած ակցիզային հարկի բարձրացման մասին:Պատգամավորը շեշտեց, որ բենզինի, դիզելային վառելիքի և սեղմված գազի շուկայում գները զգալիորեն աճել են: Դա էլ իր հերթին կհանգեցնի այդ շուկայում մատուցվող ծառայությունների արժեքի բարձրացմանը:Ընդ որում փոքր ու միջին բենզալցակայանները հայտնվել են անհավասար մրցակցային պայմաններում :

«Չեք կարծու՞մ, որ կենտրոնացման բարձր մակարդակ ունեցող ապրանքային շուկաներում տնտեսական քաղաքականությունը չպետք է սահմանափակվի հարկային ու մաքսային վարչարարության պարզեցմամբ , քանի որ նոր ներկրողները մանրածախ շուկայում բախվում են նոր խոչընդոտների»,- ասաց պատգամավորը` հավելելով, որ բենզինի ներկրման և վաճառքի շուկայում անհավասար մրցակցային պայմաններն են իշխում:Պատգամավորը հարցրեց, թե ինչ քայլեր է պատրաստվում իրականացնել կառավարությունը` շուկայում հավասար մրցակցային պայմաններն ապահովելու ուղղությամբ:

Հարցին պատասխանեց վարչապետ Կարեն Կարապետյանը: Նրա խոսքով` գնաճը ազդել է բենզինի, գազի և դիզվառելիքի և այլ ապրանքների վրա:

«Մենք մոտ ժամանակներս կտանք մանրամասն հաշվետվություն, որի հանդեպ, կխնդրեմ ուշադիր լինել: Մենք 7,7 տոկոս տնտեսական աճ ունենք, որը տարածաշրջանում ամենաբարձրն է, և ունենք գնաճ` 2,6 տոկոս, որն ամենացածրն է:Ընդ որում գնաճ կա այնպիսի պետություններում` Թուրքմենստան, Ղազախստան, Ուզբեկստան, որտեղ պետությունը գների վրա ազդում է ուղղակիորեն:Գնաճն ունի երկու բաղադրիչ, այն, ինչը շուկայից դուրս է ձևավորվում, և այն, ինչ մենք ենք անում: Ակցիզն ավելացնելով, բենզինը թանկացել է, բայց այն փոխադրման` մարդկանց և ապրանքների, գնի վրա չի ազդել, քանի որ բենզինով փոխադրում չկա: Հայաստանում ավտոտրանսպորտային միջոցների 84 տոկոսը ունի գազից օգտվելու հնարավորություն: Դիզվառելիքի պարագայում,ով աշխատում է ԱԱՀ-ով, նա շահելու է:Իսկ ով չէ`, օրինակ գյուղատնտեսը, մենք նրան կսուբսիդավորենք: Ահա ինչու այսօրվա գնաճի մեր թվերը տարածաշրջանում լավագույնն են»,- ասաց վարչապետը:

Ինչ վերաբերում է խոշոր խաղացողների շուկա մուտք գործելուն, վարչապետը նշեց, որ մեր շուկան բավական փոքր է ու դրանով իսկ` ոչ գրավիչ խոշոր խաղացողների մուտքի համար: Եվ կա վտանգ փոքր շուկաներում գերիշխող դիրք ունեցողների ձևավորման, սակայն եթե գերիշխող դիրք ունեցողը ձևավորվում է օբյեկտիվորեն` պահպանելով մրցակցային պայմանները, ապա դա նորմալ է: