«Երկու երեխաներս մահացել են». ամուսնուն դաժանաբար սպանելու մեջ մեղադրվող Ռուզաննան չընդունեց մեղքը

Արմավիրի մարզպետի խորհրդական Մանուկ Սիմոնյանի սպանության մեջ մեղադրվող Ռուզաննա Մկրտչյանի պաշտպան Նաիրա Պետրոսյանն այսօր դատարանին միջնորդեց իր պաշտպանյալի նկատմամբ կրկնակի դատահոգեբանական փորձաքննություն նշանակել:

Պետրոսյանի խոսքով՝ իր պաշտպանյալն արարքը կատարել է հոգեկան խիստ հուզմունքի վիճակում: Նա միջնորդեց փորձագետներից ճշտել՝ արդյո՞ք Ռուզաննա Մկրտչյանը տառապում է որևէ հոգեկան հիվանդությամբ, ներկայումս ի՞նչ հոգեվիճակում է գտնվում, արդյո՞ք արարքը կատարելու պահին չի գտնվել հոգեկան խիստ հուզմունքի վիճակում, արդյո՞ք ունակ է իր հոգեվիճակով ընկալել այն հանգամանքները, որոնք էական նշանակություն կարող են ունենալ գործի համար և այլն:

Նշենք, որ նախաքննության ընթացքում Ռուզաննա Մկրտչյանի նկատմամբ արդեն իսկ նշանակվել է դատահոգեբուժական և դատահոգեբանական համալիր փորձաքննություն, որի եզրակացության համաձայն՝ Մկրտչյանը հոգեկան հիվանդությամբ չի տառապել և չի տառապում: Իրեն մեղսագրվող արարքի նկատմամբ նա ճանաչվել է մեղսունակ:

Այս գործով մեղադրող դատախազ Տիգրան Ենոքյանը դատարանից ժամանակ խնդրեց միջնորդությանը ծանոթանալու և դրա վերաբերյալ դիրքորոշում հայտնելու համար:

Հիշեցնենք, որ այսօրվա նիստում Ռուզաննա Մկրտչյանը հրաժարվեց, որ գործը քննվի արագացված դատական կարգով: Նա հայտարարեց, որ չի ընդունում իրեն առաջադրված մեղադրանքը:

Մինչ այդ Մկրտչյանը հայտնել էր նաև, որ ինքը երրորդ կարգի հաշմանդամ է, ոտքերի վիրահատության է ենթարկվել, ունի երիկամների խնդիր, խոց, երակները լայնացած են և այլն:

Նա նաև հայտարարեց, որ բացի Նորիկ Մանուկյանից երկու երեխա էլ է ունեցել, որոնք մահացել են:

«Երկուսը մահացել են, մեկը ողջ է, 23 տարեկան է: Մեկը մահացել է 11 ամսականում, մյուսը ծնվելուց մի քանի օր առաջ»,-ասաց նա: Դատավորի ճշտող հարցին, թե երբ է մահացել նրա երրորդ երեխան, ամբաստանյալը պատասխանեց,- «Հղիության 8 ամսականում»: Ամբաստանյալը հավանաբար նկատի ուներ պտղի ներարգանդային մահը:

Այսպիսով դատարանը ժամանակ տվեց դատախազին ամբաստանյալի պաշտպանի միջնորդության վերաբերյալ դիրքորոշում հայտնելու համար:

Համաձայն մեղադրական եզրակացության՝ Ռուզաննա Մկրտչյանն ապօրինաբար, դիտավորությամբ կյանքից զրկել` սպանել է ամուսնուն` Մանուկ Նորիկի Սիմոնյանին: Կնոջ նկատմամբ խափանման միջոց է ընտրվել կալանավորումը:

Թագուհի Մելքոնյան