Լավ էլ ուտում եմ կարտոֆիլ, դուք ձեզ տեսեք. Խոսրով Հարությունյան

ԱԺ ՀՀԿ խմբակցության պատգամավոր Խոսրով Հարությունյանն այսօր խորհրդարանում լրագրողներին ասաց, որ չի պատրաստվում ներողություն խնդրել և հրաժարական ներկայացնել իր կատարած հայտարարությունների համար: «Ես որևէ հայտարարություն չեմ արել, այլ մեկնաբանել եմ իմ գործընկերոջ խոսքը»,- ասաց նա:

Հարցին` կարտոֆիլ չի՞ օգտագործում, պատասխանեց. «Իմիջիայլոց, լավ էլ ուտում եմ, դուք ձեզ տեսեք»:

«Ի՞նչ միս եք նախընտրում» հարցին էլ արձագանքեց. «Դուք արդեն զավեշտի եք վերածում»:

Հիշեցնենք, որ ՀՀԿ-ական պատգամավոր Հակոբ Հակոբյանը ասել էր. «Աղքատը քիչ է ծախսում, հետևաբար, թանկացումը բերում է նրան, որ աղքատը ստիպված, ինքնաբուխ ձևով խուսափելու է թանկացած ապրանքներից: Աղքատ մարդկանց մոտ սովորություն կա, որ նրանք խուսափում են թանկացած կամ թանկ ապրանք գնելուց»:

Հարությունյանն էլ ասել էր. «Պատկերացրեք՝ կա ընտանիք, որը միայն կարտոֆիլ է օգտագործում: Հիմա եթե միսը թանկ է կամ էժան, ինքը, միևնույն է, գումար չունի միս գնելու, շարունակում է կարտոֆիլ օգտագործել»: