Գյուղացու համար ջուրն էժանացնել, հողի հարկը պակասեցնել. Արամ Սարգսյան

2018թ. բյուջեի նախագծի քննարկման ժամանակ «Ելք» խմբակցության պատգամավոր Արամ Սարգսյանը հայտարարեց, թե, իր կարծիքով, բյուջեի նախագիծը քաղաքական նախագիծ է, և դրա տնտեսագիտական մասի ներկայացումը ԱԺ դահլիճում այնքան էլ ընդունելի չէ: «Ես կասկածի տակ չեմ դնում Վարդան Արամյանի տնտեսական գիտելիքները, երբեմն էլ հիանում եմ դրանցով, բայց բյուջեի նախագիծը քաղաքական նախագիծ է»,- հայտարարեց նա:

Ըստ նրա՝ բյուջեն պետք է ունենա Ա կետից Բ կետ տանող ճանապարհ: «Բյուջեի այն նախագիծը, ինչը ներկայացվեց մեզ, անձամբ ինձ չի բավարարում, և պետք է ասեմ` մի շարք պատճառներով»,- ասաց պատգամավորը:

Նա դժգոհեց, որ կրթության և գիտության զարգացման համար ընդամենը 1 մլրդ դրամի չափ գումար է հատկացվում, ու ուզում ենք` կրթությունը զարգանա:

Հաջորդ ոլորտն, ըստ պատգամավորի, արդյունաբերությունն է, որը կարող է սայլը տեղից պոկել: «Նյութական ռեսուրսներ ունեցող ճյուղը գունավոր մետալուրգիան է: Այս ոլորտում վաղուց ժամանակն է, որ ունենանք մետաղաձուլական գործարան: Մենք 150 հազար տոննայի չափ կոնցենտրատ արտահանում ենք հումքի տեսքով, երբ պատրաստը կարող ենք արտահանել: Եթե մետաղ դառնա, դրա հիման վրա կարող է զարգանալ կաբելի արտադրությունը, քիմիան, և դրան առնչվող այլ գործունեություն կարելի է ծավալել»,- ասաց նա:

Ըստ Սարգսյանի` մյուս հիմնական ուղղությունը էներգետիկան է: «Այստեղ ունենք արևի ու քամու էներգիան զարգացնելու հնարավորություն»,- ասաց նա և նշեց, թե չկան հաշվարկներ, որ օտարերկրյա ներդրողը տեսնի ու գա ներդրում անի:

Հաջորդ պոտենցիալը, ըստ նրա, ջուրն է: «Մենք ամեն տարի Սևանի չափ գետերից հոսող ջուր կորցնում ենք  և գիտեք` ուր է գնում»,- ասաց Սարգսյանը:

Պատգամավորը կարևոր ճյուղ համարեց գյուղատնտեսությունը: «Գյուղացուն պետք է ապահովել էժան ջրով, պակասեցնել հողի հարկը, չօգտագործված հողի վրա արևային էներգիա դնել. կարող ենք սուբսուիդավորել»,- ասաց նա և նշեց, որ եթե այս նախագծերը լինեին, ինքը կողմ կքվեարկեր՝ անկախ նրանից` ով կներկայացներ:

Վերջում Սարգսյանը դիմեց ԱԺ փոխխոսնակ Էդուարդ Շարմազանովին, ով ելույթում ասել էր, թե ՀՀ-ն ԵՏՄ երկրներից միակն է, որ աճ է ապահովում, մյուսների մոտ կա'մ զրոյական է, կա'մ մինուսով: «Հիմա մի հռետորական հարց, պարո'ն Շարմազանով ջան, բա ի՞նչ գործ ունենք մինուսական տնտեսության մեջ»,- հարցրեց նա:

ԱԺ նիստը վարող փոխխոսնակ, «Ծառուկյան» խմբակցության պատգամավոր Միքայել Մելքումյանը պատգամավորին տեղեկացրեց, որ Հայաստանը արտահանում է ոչ թե 150 հազար տոննա գունավոր մետաղի հումք, այլ 350 հազար տոննայի է հասել, նրա տեղեկությունը հին է: «Համաձայն եմ՝ կոմբինատի ստեղծման համար լուրջ նախադրյալներ կան»,- հավելեց նա: