CNN-ի հաղորդավարը ներառվեց Ադրբեջանի «սև ցուցակում»

CNN հեռուստաալիքի հաղորդավար, ամերիկացի շեֆ-խոհարար Էնթոնի Բըրդեյնը ներառվել է  Ադրբեջանի «սև ցուցակում» Արցախ այցելելու համար: Այդ մասին հայտնել է Ադրբեջանի ԱԳՆ մամուլի ծառայության ղեկավար Հիքմեթ Հաջիևը. հայտնում է АПА-ն:

Բըրդեյնն օրերս Շուշի էր այցելել իր «Էնթոնի Բըրդեյն. անհայտ վայրեր» հաղորդման նկարահանման համար: Հիշեցնենք, որ նա Հայաստան էր ժամանել Սերժ Թանկյանի հետ: Հաղորդավարի նկարահանումների առաջին կանգառը «Նարեկացի» արվեստի միությունն էր, որտեղ նա այցելել էր Սերժ Թանկյանի հետ. Բըրդեյնի ֆիլմում ընդգրկվելու են նաև «Նարեկացի» նվագախմբի կատարումները: Իսկ Արցախ այցի ժամանակ Բըրդեյնը  համտեսել էր ժինգյալով հաց, շիլա, խորոված, մածուն, թթի և հոնի օղի: Ամբողջ ընթացքում նկարահանող խմբին ուղեկցել էր Սերժ Թանկյանը, ով Instagram-ի իր էջում գրել էր. «Շնորհակալություն Էնթոնի Բըրդեյն` Հայաստան գալու և տեսնելու համար` իրականում այն ինչ է»: 

Նշենք, որ 2014-ին CNN-ը «Ճանապարհին» հաղորդաշարի շրջանակներում նույնպես անդրադարձել էր Հայաստանին: