Կարևորն այն է, որ ԵԽԽՎ նոր նախագահն անաչառ գործիչ է. Արթուր Ղազարյան

Քաղաքագետ Արթուր Ղազարյանն այսօր լրագրողների հետ զրույցում անդրադարձավ ԵԽԽՎ նախագահի փոփոխությանը: Նրա կարծիքով` երբ Ագրամունտի հետ տարաձայնություններ եղան, գուցե ազդեց նաև Սիրիա այցելությունը, բայց ավելի խորքային պատճառներ կային այդ տարաձայնություններում, որոնցից մեկն էլ ադրբեջանական «լվացքատան» գործի հետ էր կապված:

«Փաստը, որ թեև ուշացումով, բայց Ագրամունտը որոշեց հրաժարականի դիմում ներկայացնել, խոսում է հայկական քաղաքական դիրքերից: Փաստորեն, ստացվում է, որ ԵԽԽՎ-ում մենք հաղթանակ տարանք, երբ Ագրամունտը հրաժարական տվեց, և փոխարենը եկավ Ստելլա Կիրիակիդիսը»,- նշեց Ղազարյանը:

Ըստ նրա` այն փաստը, որ ԵԽԽՎ նոր նախագահը Կիպրոսի ներկայացուցիչն է, խոսում է այն մասին, որ նա հակաթուրքական տեսակետներ ունի, հակաթուրքական քաղաքական գծի կողմնակից է: Սակայն բանախոսը միաժամանակ նշեց, որ կարևորը ԵԽԽՎ նախագահի` անկաշառ և սկզբունքային գործիչ լինելն է: «Անկաշառ, սկզբունքային քաղաքական գործիչը մեզ համար շահեկան է, և պատահական չէ, որ մեր պատվիրակները հենց նրա թեկնածությունը պաշտպանեցին: Մեզ համար ԵԽԽՎ պրոհայկական  նախագահն այդքան էական չէ, որքան անաչառ նախագահը. նրա անաչառ գործունեությունը կբխի նախևառաջ Հայաստանի շահերից»,- ընդգծեց Ղազարյանը, ապա հավելեց, որ այս տեսանկյունից ԵԽԽՎ նախկին և ներկայիս նախագահներն անհամեմատելի են:

Նա անդրադարձավ նաև ԵԽԽՎ-ում ընդունված հակաադրբեջանական նախագծերին, որոնց դեմ են քվեարկել միայն թուրքական և ադրբեջանական պատվիրակները:«Հետաքրքիրն այն է, որ Ադրբեջանի ժողովրդավարական գործընթացների նահանջի հետ կապված նախագծին դեմ են քվեարկել նաև թուրքական պատվիրակության երկու ներկայացուցիչներ»,- ասաց նա:

Ղազարյանն ընդգծեց, որ ադրբեջանական հակահումանիստական գործունեությունն այնքան ցցուն է, որ նույնիսկ Թուրքիայի պատվիրակներն են կողմ քվեարկել նման հակաադրբեջանական նախագծին: