Բնակարանը հիպոթեքով է, առանձնատան համասեփականատերն է

Արագածոտնի մարզպետ Աշոտ Սիմոնյանը Yerkir.am-ի հետ զրույցում հայտնեց, թե ինչու է իր հայտարարագրում բացակայում «Ամինտաս Գրուպ»-ից ստացվող` իր շահաբաժինը:

Նշենք` օրերս մամուլում շրջանառվում էր, թե Արագածոտնի մարզպետն իր ամբողջ ունեցվածքը չէ, որ հայտարարագրել է:

«Խոսքը վերաբերում է 7 մլն 310 հազար դրամին, որը ես 2016 թվականին հայտարարագրել եմ` որպես  ԱԺ պատգամավորի թեկնածու: Այդ գումարը «Ամինտաս Գրուպ»-ի` իմ ստացած շահաբաժինն է: Եթե նրանք մի քիչ դիլետանտ չլինեին և մի քիչ գիտելիքներ ունենային, կհասկանային` ես 2017 թվականի հունվարի 1-ից մինչև պաշտոնը ստանձնելու օրը` հունիսի 13-ը, շահաբաժին չէի կարող ստանալ մեկ պարզ պատճառով` շահաբաժինը ենթակա է բաշխման հաշվետու տարվա ավարտին: Շահաբաժինն ամեն ամիս կամ ամեն օր չեն ստանում, շահաբաժինը ստանում են հաշվետու տարվա ավարտից հետո` տարին ամփոփելով, օրենքով սահմանված կարգով հարկային պարտավորությունը կատարելուց հետո»,- բացատրեց մարզպետը:

Ինչ վերաբերում է առանձնատանը և 5 հողամասերին, ապա Սիմոնյանը հայտնեց, որ ինքը համասեփականատեր է: «Եթե խոսքը 5 հողամասի և առանձնատան մասին է, ես համատեղ սեփականատեր եմ: Այդ հողակտորները 90-ական թվականներին իմ ընտանիքին տրամադրված հողակտորներն են` սեփականաշնորհման արդյունքում: Քանի որ մեր համայնքում մեծ հողակտորներ չկան, դրանք փոքր-փոքր հողակտորներ են, որ  ԽՍՀՄ  փլուզումից հետո տվեցին մեզ 5 վկայականով: Իսկ առանձնատունն իմ հայրական տունն է, որտեղ ես նույնպես համատեղ սեփականատեր եմ»,- ասաց նա:  

Իսկ բազմահարկ շենքում իր բնակարանի մասին Սիմոնյանը հայտնեց. «3 սենյականոց բնակարան է,  որը ես 2012 թվականին հիպոթեքային վարկով ձեռք եմ բերել և մինչև 2022 թվականը վարկը պիտի մարեմ»:

Ուշագրավ է, որ հոդվածը վերնագրվել էր «Արագածոտնի մարզպետի կալվածքները, տները եւ թաքցրած բաժնետոմսը»: