Լատվիացիներին ադաթ է, Արցախի ժողովրդին՝ ո՞չ․ Շարմազանով

Այսօր ՀՀԿ ԳՄ նիստից հետո ՀՀԿ խոսնակ Էդուարդ Շարմազանովը անդրադարձավ Լատվիայի և Ադրբեջանի նախագահների  ռազմավարական համագործակցության հռչակագիր ստորագրմանը։

«Տարօրինակ և զավեշտալի է, որ ԵՄ անդամ Լատվիան ռազմավարական հռչակագիր է ստորագրում մի պետության հետ, որը մարդու իրավունքների խախտման ամենաակնառու օրինակն է հանդիսանում մեր տարածաշրջանում»,- ասաց Շարմազանովը։ Ինչ վերաբերում է Ադրբեջանին, ապա նրա խոսքով՝ դա այն երկիրն է, որտեղ ժողովրդավարության ազատությունները պահպանված չեն ,  երկիրը գնում է ավտորիտարիզմի ճանապարհով, որտեղ սուլթանաթ է, և որտեղ երկրի նախագահն իր սիրելի տիկնոջը նշանակում է առաջին փոխնախագահ:

Շարմազանովի համար այդ ամենը տարակուսելի է,  որովհետև ԵՄ-ն Մարդու իրավունքների պաշտպանության ժողովրդավարական արժեքների մարմնավորում է, և զարմանալի է  այդ արժեքները դավանող երկիրը կնքում է նման համաձայնագիր ավտորիտար պետության հետ։

Ավելին, Լատվիայի հնչեցրած հայտարարությունները ԼՂ խնդրի կարգավորման մասով հայտարարությունը հակասում է ԵՄ-ի պաշտոնական հայտարարությանը: ԵՄ ներկայացուցիչները մեկ անգամ չէ, որ հայտարարել են, որ  խնդիրը պետք  է լուծվի Մինսկի խմբի ձևաչափով, երեք հավասարազոր սկզբունքների հիման վրա, որտեղ ինքնորոշման իրավունքն ունի լուրջ դերակատարում։

«Եթե տարածքային ամբողջականությունն ավելի կարևոր է, քան ինքնորոշման իրավունքը, դուք ո՞նց առաձնացաք Խորհրդային միությունից: Լատվիացիներին ադաթ է, Արցախի ժողովրդին՝ ո՞չ: Ինքնորոշման իրավունքը պետք է գործի և՛ Լատվիայում, և՛ Լիտվայում, և՛ Հայաստանում, և՛ Ռուսաստանում, և՛ Արցախում: Մենք պետք է վերանանք կրկնակի ստանդարտներից»․- ասաց Շարմազանովը: