Գյումրեցիներն ասում են՝ մենք ձեզ ի՞նչ վատություն ենք արել, որ Բալասանյան Սամվելին կարգեցիք քաղաքապետ. Վարդևան Գրիգորյան

ԱԺ արտահերթ նիստում Կենտրոնական ընտրական հանձնաժողովի 2016թ-ի տարեկան գործունեության հաշվետվությունն է քննարկվում:

Գլխավոր զեկուցող Տիգրան Մուկուչյանից «Ծառուկյան» խմբակցության պատգամավոր Վարդևան Գրիգորյանը հարցրեց՝ օգնությամբ տրամադրված տեխնիկական սարքավորումները կիրառելուց հետո կարո՞ղ են բացառել կրկնակի քվեարկությունը:

«Սարքավորումները կարծում եմ՝ իրենց նպատակին չեն ծառայել»,-ասաց նա:

Մուկուչյանը պատասխանեց, որ այդ սարքավորումները չպետք է դիտարկեն որպես սոսկ քվեարկությունն ապահովող գործիք:

«Կան մի շարք այլ գործիքներ տեղամասերում՝ հանձնաժողովի անդամներ, դիտորդներ, աննախադեպ հրապարակային դիտորդություններ»,-ասաց նա, ապա նշեց, թե երկու ամսից հետո ստորագրված անձանց ցուցակները հրապարակվեցին և հեշտ կարելի էր տեսնել՝ ով է քվերակել, ով ոչ:

Բացի այդ նա նշեց, որ ցանցի ապահովման խնդիր չէր էլ դրվում: Վարդևան Գրիգրյանը արձագանքեց՝ Գյումրու ավագանու ընտրություններից հետո գյումրեցիները Մուկուչյանին են մեղադրում, որ արդար սկզբունքով քաղաքապետ չնշանակվեց:

«Գյումրեցիներն ասում են պարոն Մուկուչյան, մենք ձեզ ինչ վատություն ենք արել, որ մեր 66% ձայներն անտեսեցիք և 34% ձայն ունեցող Բալասանյան Սամվելին կարգեցիք Գյումրիի քաղաքապետ: Չեք գտնում, որ օրենքն ունի լուրջ թերություն»,-ասաց նա: Տիգրան Մուկուչյանը պարզաբանեց, թե ինչպես Գյումրիի, այնպես էլ Վանաձորի ընտրությունները նոր կարգով էին անցկացվում:

«Այստեղ հանձնաժողովի կամ իմ կողմից որևէ մեկին կարգելու խնդիր չի եղել, բոնուսային համակարգի կիրառում է տեղի ունեցել և դա բազմաթիվ երկրներ կիրառում են»,-ասաց նա: Մուկուչյանը նշեց, որ իրենք օրենքի կարգավորումից չեն շեղվել և եթե փոփոխության կարիք կա, պետք է օրենսդրական քաղաքականությամբ կարգավորվի: