ԱՄՆ պետքարտուղարը կմեկնի Թուրքիա

Հուլիսի 9-ից 10-ը ընկած ժամանակահատվածքում ԱՄՆ պետքարտուղար Ռեքս Թիլերսոնը կլինի Ստամբուլում: Ըստ թուրքական «Milliyet» թերթի կայքի՝ այցի ընթացքում նա հանդիպելու է թուրք բարձրաստիճան պաշտոնյաների հետ. տեղեկացնում է Ermenihaber-ը:

Սպասվում է, որ վերոնշյալ հանդիպումների ժամանակ օրակարգային թեմաներից են լինելու Սիրիայում քրդական ուժերի գործողությունները, կատարյան ճգնաժամի վերջին զարգացումները, ինչպես նաև իսլամի քարոզիչ, ամերիկաբնակ միլիարդատեր Ֆեթուլահ Գյուլենի արտահանձման հարցը: Նրան թուրքական իշխանությունները մեղադրում են անցած տարի Թուրքիայում տեղի ունեցած ռազմական հեղաշրջման փորձը նախաձեռնելու մեջ: 

Աղբյուրը հիշեցնում է, որ Թիլերսոնը վերջին անգամ Թուրքիա էր մեկնել մարտի 30-ին: Իսկ նախորդ շաբաթ էլ հեռախոսազրույց էր կայացել Թուրքիայի և ԱՄՆ նախագահների միջև, որի ժամանակ քննարկվել էր Քաթարի շուրջ ստեղծված իրավիճակը: