Կիևում ձերբակալել են սերիական գողի, ով հանցանքի վայրում շոկոլադ էր թողնում

Ուկրանիայի ոստիկանությունը հայտարարել է բանկեր թալանող հանցագործին ձերբակալելու մասին, ով հանցանքի վայրում շոկոլադ էր թողնում:

Ոստիկանությունը գողին փնտրում էր մոտ կես տարի:Անգամ հայտարարել էր, որ պատրաստ է մոտ 4000 դոլար վճարել այն ինֆորմացիայի համար, որը կօգներ բռնել հանցագործին:

Ի վերջո ոստիկանությանը հաջողվել է բռնել 1967թ ծնված հանցագործին, ով խոստովանել է կատարած թվով 30 հանցագործության մասին: Հանցագործը ընտրում էր թույլ վերահսկողություն ունեցող բանկերը, նախ հետախուզում իրականացնում, հետո գործում: Նա երբեք չէր օգտվում հեռախոսից, և դեմքը փակում էր գլխարկով ու ակնոցով:

Ըստ ոստիկանության, նա միշտ գործում էր չափազանց հանգիստ ու հավասարակշռված: Ամեն հանցագործությունից հետո, նա որպես «փոխհատուցում» թողնում էր շոկոլադ կամ կոնֆետ: Դա նրա «ֆիրմային ձեռագիրն» էր:

Հանցագործը ոստիկանությանն ասել է, որ թալանել է թալանածը, և որ թալանած փողերի մի զգալի մասը նա նվիրաբերում էր բարեգործական ակցիաներին: