Տիգրանյանի «Անուշ» օպերան՝ Մեծամոր քաղաքի մշակույթի տան բեմում

ՀՀ մշակույթի նախարարության «Մշակութային կանգառ» ծրագրի շրջանակում` ս. թ. հունիսի 20-ին Ա. Սպենդիարյանի անվան օպերայի և բալետի ազգային ակադեմիական թատրոնի արտիստները Արմավիրի մարզի Մեծամոր քաղաքի մշակույթի տանը ներկայացրել են Ա. Տիգրանյանի «Անուշ» օպերան:
Գլխավոր դերերում հանդես են եկել Ալինա Փահլևանյանը /Անուշ/, Լիպարիտ Ավետիսյանը /Սարո/, Գեորգի Առաքելովը /Մոսի/: Ներկայացման դիրիժորն էր Աթանես Առաքելյանը: Թատրոնի գեղարվեստական ղեկավար՝ ՌԴ վաստակավոր արտիստ Կոնստանտին Օրբելյան:

Մեծամորցիները մեծ խանդավառությամբ են ընդունել օպերային թատրոնի արտիստներին և ցանկություն հայտնել՝  այսօրինակ այցերը դարձնել պարբերական: Մեծամորի մշակույթի տանը, Ա. Տիգրանյանի «Անուշ» օպերան դիտել են հանդիսականներ` Արմավիրի մարզի տարբեր բնակավայրերից:

Հիշեցնենք, որ ՀՀ մշակույթի նախարարության «Մշակութային կանգառ» ծրագիրը մեկնարկել է ս. թ. հունվարի 26-ին: Ընդհանուր առմամբ, ծրագրի շրջանակում ՀՀ և ԼՂՀ 98 համայնքում կիրականացվի 426 միջոցառում` թատերահամերգային ծրագրեր, ցուցահանդեսներ, կինոցուցադրություններ:

Ծրագրի գլխավոր հովանավորն է «Մարդկային ռեսուրսների «Փյունիկ» հիմնադրամը: