Չդավաճանելով Տիգրանյանի եւ Թումանյանի ոճին

Ապրիլի 26-ին եւ 27-ին Գաբրիել Սունդուկյանի անվան ազգային ակադեմիական թատրոնում տեղի կունենա Հովհաննես Թումանյանի «Անուշ» պոեմի հիման վրա համանուն օպերայի` հայ-ֆրանսիական համատեղ նախագծի պրեմիերան:

Բեմադրության եւ լիբրետոյի ադապտացիայի հեղինակ Սերժ Ավետիքյանը լրագրողների հետ հանդիպման ժամանակ նշեց, որ այն կպատմի, թե ինչպես կարելի է մեկնաբանել պոեմը` չդավաճանալով Տիգրանյանին եւ Թումանյանին:

«Տիգրանյանի աշխատանքին դիպչելը բավականին պատասխանատու եւ համարձակ քայլ է: Փորձերը մեկնարկել են մեկ շաբաթ առաջ եւ շարունակվելու են մինչ պրեմիերայի օրը»,- ասաց Ավետիքյանը:

Ի դեպ, օպերայի նոր տարբերակի գործիքավորման եւ երաժշտության վերամշակումը իրականացրել է Անահիտ Սիմոնյանը, դիրիժորն է Վահան Մարտիրոսյանը: Անուշի դերում հանդես է գալու Սոֆյա Սայադյանը, իսկ Սարոյի դերում` Լիպարիտ Ավետիսյանը: