Կոչ տաքսի ծառայություն մատուցողներին. գործե՛ք օրենքի շրջանակներում

«Ավտովարորդների իրավունքների պաշտպանության լիգա» ՀԿ նախագահ Տիգրան Հովհաննիսյանն իր երեկվա մամուլի ասուլիսում անդրադարձել է տաքսի ծառայությանն առնչվող մի շարք հարցերի:

Մի կողմ թողնելով իրավական ակտերի կամայական մեկնաբանությունները՝ հարկ ենք համարում նշել, որ ասուլիսում հնչած հայտարարությունները, մեղմ ասած, որևէ կապ չունեն իրականության հետ:

Նախարարությունը մշտապես հանդես է եկել բաց, թափանցիկ աշխատաոճի օգտին: Հասարակական բոլոր շերտերի, առավել ևս՝ բանախոսի և նրա «շահառու» տաքսու վարորդների առաջ նախարարության դռները միշտ բաց են եղել: 

Դրա վկայությունն են նախարարի, նրա տեղակալների, համապատասխան ստորաբաժանումների ղեկավարների մոտ տաքսու վարորդների, ուղևորափոխադրողների և հենց իր մասնակցությամբ  մինչ այսօր տեղի ունեցած բազմաթիվ հանդիպումներն ու քննարկումները, որոնք ամենայն մանրամասնությամբ լուսաբանվել են և՛ զանգվածային լրատվամիջոցներում, և՛ նախարարության պաշտոնական կայքում: 

Ոլորտում, իրոք, կան լուծման կարիք ունեցող բազմաթիվ հարցեր, որոնց ուղղությամբ նախարարությունը հետևողական աշխատանք է կատարում: Բնականաբար առաջնահերթ գերակայություն է տրվում ոչ թե անօրինական գործունեության անընդունելի փառաբանումներին, երկարաշունչ, բայց որևէ հոդաբաշխ միտք չարտահայտող մերկապարանոց հայտարարություններին, այլ հասարակությանը մատուցվող ծառայությունների որակի և արդյունավետության բարձրացմանը: 

Դրան են միտված նաև «Ավտոմոբիլային տրանսպորտի մասին» ՀՀ օրենքում և մի շարք այլ իրավական ակտերում փոփոխություններ և լրացումներ կատարելու մասին ՀՀ օրենքների նախագծերը: Ի դեպ, այդ նախագծերը դեռևս մայիսի 22-ից հրապարակված են նախարարության պաշտոնական կայքի «Իրավական ակտերի նախագծեր» բաժնում, մատչելի ու տեսանելի են երկրի ամբողջ տարածքում, պարզ և հասանելի՝ հասարակական հնարավոր բոլոր շերտերի համար: Սակայն  առ այսօր նա, նախարարությունում ձևավորված տաքսի ծառայությունների ոլորտի բարեփոխումներով զբաղվող աշխատանքային խմբի անդամ լինելով հանդերձ, այդ նախագծերից և ոչ մեկի վերաբերյալ որևէ գրավոր առաջարկություն չի ներկայացրել: Այնպես որ, այդ պնդումը ևս իրականության հետ գոնե մոտավոր աղերս չունի:

Փոխարենը նա հանդես է գալիս անօրինական գործունեություն ծավալելու օգտին, ընդ որում՝ շատ լավ գիտակցելով վարորդների համար դրա հետևանքները:

Անդրադառնալով հասարակական խորհրդի վերաբերյալ դարձյալ իրականության հետ կապ չունեցող «փաստարկին»՝ նշենք, որ այդ կառույցը ձևավորվել է 2014թ. մայիսին, դրան մասնակցելու հնարավորություն ունեն չափորոշիչներին համապատասխանող բոլոր հասարակական միավորումներն ու կազմակերպությունները:

2016 թվականին նախարարությունը հասարակական խորհրդին անդամակցելու առաջարկով 3 անգամ հանդես է եկել պաշտոնական հայտարարությամբ, սակայն վերոնշյալ լիգան երբևէ չի դիմել: Ուստի սեփական անգործության համար պետական մարմնին մեղադրելը չի տեղավորվում գրագետ իրավահարաբերությունների և գործակցության շրջանակներում: 

Ինչ վերաբերում է տաքսի ծառայություն մատուցողների համար հնչող իբր մտահոգություններին, ապա նախարարությունը ոչ պակաս մտահոգ է նրանց հոգսերով և դրանք այս կամ այն ծավալով իրենց արտահայտությունն են գտնում նախարարության թե՛ ամենօրյա և թե՛ օրենսդրական գործունեության ընթացքում:

Վերահաստատելով տաքսի ծառայություն մատուցողների խնդիրների և հոգսերի նկատմամբ մտահոգությունը՝ նախարարությունը կոչ է անում.

1. լիգայի նախագահին. մերկապարանոց հայտարարությունների փոխարեն հանդես գալ օրենսդրության սահմաններում տեղավորվող հստակ առաջարկներով և չանցնել կոռեկտության սահմանները, 

2. տաքսի ծառայություն մատուցել պատրաստվող անձանց. նախարարության հետ իրավահարաբերություններում կտրականապես ձեռնպահ մնալ միջնորդավորված (լիազորագրով) ծառայություններից, լիարժեք օգտվել նախարարության վարչական շենքի առաջին հարկում գործող «Մեկ պատուհանից»:

Անհրաժեշտության դեպքում անձամբ՝ առանց միջնորդի կարող եք կապ հաստատել նախարարությունում  գործող  «թեժ գծի» և տեղեկատու հեռախոսահամարներով՝ անհրաժեշտ խորհրդատվություն և պարզաբանումներ ստանալու համար: