Amnesty International-ը մտահոգված է Թբիլիսիում ադրբեջանցի ընդդիմադիր լրագրողի առևանգման առնչությամբ

Amnesty International միջազգային իրավապաշտպան կազմակերպությունը կոչ է անում Վրաստանի կառավարությանը` հետաքննել Թբիլիսիում ադրբեջանցի ընդդիմադիր լրագրող և ակտիվիստ Աֆղան Մուխթարլըի առևանգման գործը և պարզել, թե արդյո՞ք դրա հետ որևէ կապ ունեն Վրաստանի ուժային գերատեսչությունները. հայտնում է  apsny.ge-ն::

Այդ մասին Վրաստանի հանրային հեռուստաընկերության «Մոամբե» տեղեկատվական ծրագրին տված հարցազրույցում հայտնել է Amnesty International կազմակերպության ներկայացուցիչ Լևան Ասատիանին: Հաղորդվում է, որ իրավապաշտպանը զրուցել է լրագրողի փաստաբանի հետ:

«Amnesty International»-ը մտահոգված է լրագրողի ծեծի փաստի առնչությամբ»,- նշել է Լևան Ասատիանին:

Հիշեցնենք, որ լրագրողի փաստաբան  Էլչին Սադիղովը Кавказский узел-ին պատմել է, որ անհայտ անձինք նրան ուժով նստեցրել են «Օպել» մակնիշի մեքենա, ծեծել, հասցրել Ադրբեջանի սահմանապահ ուղեկալներից մեկը և նրա մոտ 10 հազար եվրո թողել, որպեսզի հետագայում մեղադրեն մաքսանենգության  և սահմանը անօրինաբար հատելու մեջ: