CNNTurk-ը հեռացրել է եթերից Էրդողանի ամերիկյան այցը մեկնաբանող հաղորդավարուհուն

CNNTurk հեռուստաալիքի ամենավարկանիշային համարվող հաղորդավարուհի Նևշին Մենգյուն նախագահ  Ռեջեփ Թայիփ Էրդողանի՝ ԱՄՆ կատարած այցը մեկնաբանելուց հետո հեռացվել է եթերից. տեղեկացնում է Ermenihaber-ը:

Ամեն օր հեռաուստալիքով հեռարձակվող «Գլխավոր լուր» հաղորդման հաղորդավարուհի Մենգյուն, հավատարիմ մնալով հաղորդման ֆորմատին, լուրերը ներկայացնում է իր սեփական մեկնաբանմամբ ու գնահատմամբ: Եվ այս անգամ Էրդողան-Թրամփ հանդիպումը մեկնաբանելիս հաղորդավարուհին ակնարկել է, որ հանդիպումը սպասվածից կարճ է տևել՝ ասելով. «Էրդողանի մտնելն ու դուրս գալը (Թրամփի սենյակ- խմբ.), նստելն ու զրուցելը` բոլորը միասին տևել է ընդամենը 23 րոպե»:

Ըստ «Սոնդաքիքա» լրատվական կայքի՝ Մենգյուի այս մեկնաբանությունը դուր չի եկել իշխանամետ հատվածին, և նա քննադատությունների թիրախ է դարձել: Այս ամենից հետո CNNTurk-ը որոշում է կայացրել Մենգյուին հեռացնել եթերից: Ըստ աղբյուրի՝ ամենայն հավանականությամբ, նրան հեռուստաալիքում այլ  հաստիք կառաջարկվի: