Ռեւանշիզմ, «վանդալիզմություն»…լրագրողները Տարոն Մարգարյանից «քննություն էին վերցնում»

Այսօր Երևանի Դավիթաշեն վարչական շրջանում գործող քաղաքապետ, Երևանի ավագանու ՀՀԿ ցուցակը գլխավորող Տարոն Մարգարյանը լրագրողների հետ զրույցում անդրադարձավ Դավիթաշեն համայնքում հատված ծառերի խնդրին:

Հարցին` նա դա որակել էր վանդալիզմ, սակայն ծառերը սկսեցին կանաչել, և կալանավորված անձը ազատ արձակվեց, ուրեմն չէ՞ր ուսումնասիրել, որ խորը էտ է արվել և դրա համա՞ր է որպես վանդալիզմ բնութագրել, Մարգարյանը հարցին հարցով պատասխանեց. «Իսկ դուք ուսումնասիրել ե՞ք, որ դա խորը էտ էր», ապա հավելեց. «Ես այդ կարծիքին չեմ, գործ է հարուցված, և քննություն է շարունակվում»:

Դիտարկմանը` ծառերը կանաչել են, իսկ այդ մարդուն ազատ են արձակել, քաղաքապետն արձագանքեց. «Եթե ծառը ծայրից ծայր էլ կտրես, ինքը ճյուղ տալու էր, դա մասնագիտական է, ինձ թվում է փորձաքննություն է ընթանում: Այսօր մենք ասում ենք` դա խորը էտ չի և բոլոր մասնագետներն են ասում: Դա ծառերի հատում է, իրավապահները զբաղվում են: Այսքան ժամանակ տեսել ե՞ք, որ ծառերի էտման համար գործ հարուցվի, փաստ է, որ հարուցվել է»:

Իսկ լրագրողի դիտարկմանը, որ նա այդ երևույթը վանդալիզմություն է համարել, իսկ հայերենում նման բառ չկա, Տարոն Մարգարյանն այդպես էլ չարձագանքեց:

Yerkir.am-ի դիտարկմանն էլ` քաղաքապետը կողմ է՞ ռևանշիզմին, նա արձագանքեց. «Ուզում ե՞ս իմ կարծիքն իմանալ: Ես իմ կարծիքն արտահայտել եմ այլ լրատվամիջոցի, կնայեք, կիմանաք»:

Նշենք, որ համաձայն կայքերից մեկի հրապարակած հարցազրույցի տեքստի, Տարոն Մարգարյանն ասել է.«Ես անձամբ դեմ եմ պատմության վերանայմանը, ռևանշիզմին, արհեստական մաքրազերծումներին»: Ցավոք, Մարգարյանն այսօր չկարողացավ արտաբերել այդ միտքը: