Ըստ վարչապետի, Տարոն Մարգարյանից լավ քաղաքապետի թեկնածու չկա

Վարչապետ Կարեն Կարապետյանը քվեարկել է հանուն լավ Երեւանի: Այս մասին քաղաքացիական իր պարտքը կատարելուց հետո լրագրողների հետ զրույցում հայտնեց Կարապետյանը:

Լրագրողների դիտարկմանը, որ ցուցակներ են հրապարակվել, թե ինչպես է ոստիկանության ՊՊԾ գունդը ձայներ ապահովելու Տարոն Մարգարյանի համար, ինչ կասի այդ մասին, հայտնեց, որ չի տեսել այդ հրապարակումը, բայց լսել է:

Հարցին, թե ինչու ընտրակաշառքը չի վերանում, Կարապետյանը կարծիք հայտնեց, որ տարեց տարի մեր ընտրությունները ավելի արդար եւ թափանցիկ են դառնում: Նաեւ նշեց, որ եթե ուզում ենք օրենքի երկիր կառուցել այդ ամենով պետք է զբաղվեն իրավապահները եւ նոր գնահատականներ հնչեցվեն:

Երեւանի նախկին քաղաքապետ Կարապետյանն ասաց, որ կցանկանար Երեւանը տեսնել ժամանակակից, ճկուն կառավարման համակարգով:

Հարցին, թե արդյոք Տարոն Մարգարյանն էր այն մարդը, ում կցանկանար ինքն անձամբ տեսնել քաղաքապետ, Կարապետյանը դրական պատասխան տվեց:

Նա նաեւ ասաց, որ ավելի լավ թեկնածու չկար Մարգարյանից բացի: