Թուրքիայում սպասվում են անկայունություն ու բռնաճնշումներ. Իսկանդարյան

Այսօր «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը լրագրողների հետ զրույցում անդրադարձավ երկու օր առաջ Թուրքիայում անցկացված սահմանադրական հանրաքվեին: Հիշեցնենք, որ սահմանադրական հանրաքվեի ժամանակ մեծամասնությունը քվեարկել է նախագահական լիազորությունների ընդլայնման օգտին, ինչը նշանակում է, որ Էրդողանը կարող է պաշտոնավարել մինչև 2029 թվականը:

Իսկանդարյանի խոսքով` այն, ինչ տեղի է ունենում Թուրքիայում, չափազանց կարևոր է, և սահմանադրական հանրաքվեն Թուրքիայի «ադրբեջանացման» գործընթացում ընդամենը ուղիներից մեկն էր: «Թուրքիան այսօր ավելի ու ավելի է «ադրբեջանացվում», սուլթանացվում: Սահմանադրական հանրաքվեն տեղի է ունեցել մեծածավալ խախտումներով, քրդերի մասնակցությունը քիչ է եղել, ԵԱՀԿ-ն բացասական կարծիք է հայտնել: Այս ամենը վկայում է այն մասին, որ Թուրքիայում հասարակությունը պառակտվում է. քաղաքային` առավել զարգացած բնակչությունը դեմ է այն պրոցեսին, որն ընթանում է Թուրքիայում, իսկ գյուղական` ավանդական հասարակությունը կողմ է: Ուստի Թուրքիային սպասվում է անկայություն»,- ասաց Ալեքսանդր Իսկանդարյանը:

Քաղաքագետի կարծիքով` անկայունությունը Թուրքիայում սկիզբ է առել դեռևս 2015-ից, երբ Գեզի այգում սկիզբ առան հուզումներ, այդ ամենը շարունակություն ստացավ անցյալ տարվա հեղափոխության փորձով: Ինքը` Էրդողանը, կարողանում էր իր նպատակներին հասնել` Թուրքիայում լարվածության աճ հրահրելով: Ըստ քաղաքագետի` Թուրքիայում կշարունակվեն բռնաճնշումները լիբերալ տրամադրություններ ունեցողների, քրդական շրջանների նկատմամբ, կլինեն նաև խոսքի ազատության սահմանափակումներ:

Ինչ վերաբերում է ԵՄ-ին Թուրքիայի անդամակցության հեռանկարին, Ալեքսանդր Իսկանդարյանը նշեց, որ Թուրքիան չունի որևէ հեռանկար` անդամակցելու ԵՄ-ին: Իրական բանակցություններ այդ թեմայով գոյություն չունեն, այդպիսի օրակարգ չկա, լուրջ հեռանկարներ էլ չկան: Թուրքիան գնալով վերածվում է Եգիպտոսի պես պետության, ոչ թե` եվրոպական: Եվրոպային էլ իր խնդիրները բավական են և Թուրքիայով չի հետաքրքրվում:

Ինչ վերաբերում է մահապատիժը վերականգնելուն, քաղաքագետի խոսքով` հայտնի չէ, թե որքանով այդ գաղափարն առաջ տանելը պետք կգա Էրդողանին` 2019-ի ընտրությունների համատեքստում, սակայն նա կշարունակի այդ միտքն առաջ տանել, մանավանդ` Թուրքիան որևէ հեռանկար չունի ԵՄ-ին անդամակցելու համար: