Ադրբեջանի իշխանություններն ամենաշատ բռնաճնշումներ կիրառողներից են Եվրոպայում. Amnesty International

Իշխանության քննադատների նկատմամբ սպառնալիքները, ֆիզիկական բռնություններն ու ձերբակալությունները դարձել են Ադրբեջանի ղեկավարության այցեքարտը։ Մի երկրի, որը պատրաստվում է հյուրընկալել առաջին Եվրոպական խաղերը: Այդ մասին ասված է խաղերի բացման արարողությունից 100 օր առաջ հրապարակված` Amnesty International միջազգային իրավապաշտպան կազմակերպության զեկույցում. գրում է contact.az-ը:

«Իրավապաշտպաններին և ակտիվիստներին կալանավորում են, քննադատներին կեղծ մեղադրանքներով ձերբակալում, ծեծի ենթարկում»,- ասվում է զեկույցում:

 «Ադրբեջանի իշխանություններն ամենաշատ բռնաճնշումներ կիրառողներից են Եվրոպայում»,- ասել է Amnesty International-ի՝ Եվրոպայի և Կենտրոնական Ասիայի գծով տնօրեն Ջոն Դալուսենը:

Զեկույցում նշվում է իրավապաշտպան Լեյլա Յունուսի, ընդդիմադիր լրագրող Խադիջա Իսմայլովայի ձերբակալության և մի շարք ակտիվիստների ծեծի ենթարկելու մասին:

«Ադրբեջանի նավթադոլարների վրա իրենց հայացքը կենտրոնացնելով՝ միջազգային հանրությունը զարմանալիորեն լռում է երկրի ռեպրեսիվ քաղաքականության և մարդու իրավունքների խախտումների մասին»,- ասել է Ջոն Դալուսենը:

Amnesty International-ը կոչ է անում Ադրբեջանի իշխանություններին` անմիջապես և անվերապահորեն բաց թողնել բոլոր քաղբանտարկյալներին: