Ինչու էր Փոստանջյանը ցանկանում լքել տաղավարը

«Էրեբունի» թանգարանի մոտ կայացած ասուլիսի ժամանակ «Երկիր ծիրանի» կուսակցության հիմնադիր Զարուհի Փոստանջյանն անդրադարձավ իր կուսակցության անվան շուրջ հնչած կարծիքներին, մասնավորապես` որ  կուսակցության անվանումից սկսած մինչև կարգախոսը` պաթոս է, և իրատեսական չէ «Դեպի Արարատ» կարգախոսը:

Փոստանջյանի կարծիքով` եթե չես ձգտում անհնարինին, ապա չես կարող իրականացնել հնարավորը: «Եթե դու խոսում ես պաթոսից ու ասում, որ քաղաքականությունը երազանք չէ, ապա այդպես ասողներն են  ձախողել: Մենք վերցրել ենք մեր երկրի իրական անվանումը»,- ասաց նա, ապա հավելեց.  «Երկիր ծիրանին մեր երկրի իրական անվանումն է, մենք չենք թարգմանել օտար լեզուներից, օտարամուտ անուններ չենք վերցրել մեր կուսակցության համար, այլ դիմել ենք մեզ պատկանող ժառանգությանը և ճիշտ ենք արել»:

Լրագրողի հարցին` հաղորդումներից մեկի ժամանակ հարց է հնչել, իսկ նա ցանկացել է հեռանալ, Փոստանջյանն արձագանքեց. «Այո, եղել է նման բան: Նույն հարցը նույն հաղորդման ընթացքում մի քանի անգամ տալը` էթիկայի կանոնների խախտում է»:  

Հիշեցնենք, որ «Կենտրոն» հեռուստաընկերության «Ուրվագիծ» հաղորդման ժամանակ Փոստանջյանը հաղորդման կեսից ցանկացել է լքել տաղավարը: