Կարմիր լույս է միացել. ընտրություն կատարած քաղաքացին նորից է անձնագիրը տվել հաշվառման

Թիվ 9/41 ընտրատեղամասում այսօր միջադեպ է տեղի ունեցել: Կրկնակի քվեարկության փորձ հիշեցնող պատմությունը, ըստ ընտրատեղամասի հանձնաժողովի նախագահ Անահիտ Նավոյանի, ուղղակի թյուրիմացություն է:

«Ընտրողը կատարել էր իր քվեարկությունը ու դուրս չէր եկել ընտրատեղամասից, այլ ներսում եղբորն էր սպասել: Նա կանգնել էր անձի ինքնությունը ստուգող սարքի մոտ: Սարքի մասնագետը, չիմանալով, որ կանգնածն ուղղակի սպասում է, նրա անձնագիրն էր ուզել, իսկ տղամարդն ինքնաբերաբար տվել էր անձնագիրը: Երբ տվյալները գրանցել էին, սարքի վրա անմիջապես կարմիր լույս էր միացել, քանի որ այն մեկ անգամ արդեն գրանցել էր ընտրողին»,- Yerkir.am-ի հետ զրույցում ասաց Նավոյանը:

Նա տեղեկացրեց, որ խնդրի կապակցությամբ իրենք դիմել են ոստիկանություն, ոստիկաններն արձանագրել են դեպքը, բացատրություն վերցրել և նյութեր են նախապատրաստում: Նավոյանի հավաստմամբ` քաղաքացին երկրորդ անգամ չի քվեարկել: