Ընտրել եմ հանուն այն բանի, որ մյուս ընտրությունները փողով չլինեն. Տարոն Տոնոյան

Արագածոտնի մարզում ՀՅԴ ռեյտինգային ցուցակով առաջադրված թեկնածու, բժիշկ Տարոն Տոնոյանն ընտրել է հանուն արդարության, «մեր խեղճ ու կրակ ժողովրդի ապագայի համար», ընտրել է հանուն այն բանի, որ մյուս ընտրությունները փողով չլինեն: Yerkir.am-ի հետ զրույցում նա հայտնեց, որ գնացել էր Պռոշյան գյուղը` կատարելու իր ընտրությունը:

Տոնոյանը նշեց, որ Արագածոտնի մարզում ընտրություններին մասնակցողները բավական ակտիվ են, ինչը պայմանավորված է գումարով, իսկ որոշ ընտրատեղամասերում կան նաև կուտակումներ:

Խոսելով ապրիլյան քառօրյա պատերազմի մասին` նա նշեց, որ չէր ուզի` ապրիլի 2-ը մեր պատմության մեջ սգո օր լինի: «Ճիշտ է, կորուստներ ենք ունեցել, բայց մենք դիմակայել ենք ուխտադրուժ կերպով մեզ վրա հարձակված մեծաքանակ զորքի, հերոսական պայքար է եղել, ինչի համար էլ կուզեի` ապրիլի 2-ը ոչ թե սգո, այլ հերոսության օր համարվեր»,- ասաց Տոնոյանը: