Մենք ներկայացնում ենք ստուգված ծրագիր, ոչ թե խոստումներ ենք տալիս, որոնք չգիտենք՝ ինչպես կատարել. Ռուստամյանը՝ ապարանցիներին

Հայտնել ենք, որ ՀՅԴ ներկայացուցիչները նախընտրական քարոզարշավի շրջանակներում այս անգամ էլ հանդիպում ունեցան Արագածոտնի մարզի ընտրողների հետ: Երեկ Ապարանում կայացած հանդիպման ընթացքում ՀՅԴ համապետական ցուցակը գլխավորող` ՀՅԴ Բյուրոյի քաղաքական ներկայացուցիչ Արմեն Ռուստամյանը, դիմելով ներկաներին, ասաց, որ նրանցից յուրաքանչյուրը պետք է գիտակցի, որ իր ձայնը որոշիչ է և կարող է երկրի ապագա փոխել:

«Ես բազմիցս լսել ու տեսել եմ՝ պատգամավորներն ինչպես են իրենց ընտրողների հետ հարաբերվում: Ընտրողները չեն կարող գալ հետո պատգամավորից մի բան պահանջել, որովհետև պատգամավորներից շատերը նրանց ասում են` ի՞նչ ես ուզում, ես քո 10-15 հազարը չե՞մ տվել, դու էլ ձայնդ չես տվե՞լ դրա դիմաց, հիմա ի՞նչ ես ինձանից ուզում, գնա, հաջորդ ընտրությունների ժամանակը կգաս, կբարիշենք»: Հիմա ցինիզմն այն աստիճանի է հասել, որ մարդիկ պարզ, բացեիբաց  ասում են, որ պատրաստ են շատ գումար տվողի օգտին քվեարկել»,- ասաց Ռուստամյանը և ընդգծեց՝ Դաշնակցությունն այն քաղաքական ուժը չէ, որ նման կերպ վարվի իր ընտրողի հետ, քանի որ ընտրակաշառքի փոխարեն առաջարկում է համակարգային լուծումներ, որոնք սերունդների համար են օգտակար:

«Մի ընտրողի վրա 10-15 հոգի աշխատում են, անտեր ընտրող չի մնացել: Այս պրոցեսն է, որ մեզ անընդհատ բերել է այս վիճակին, և մենք հիմա պետք է այս ամենից դուրս գանք: Մենք ուզում ենք այդ վիճակից բոլորին հանել, կախվածությունից հանել, ուզում ենք, որ մարդիկ հասկանան, որ իրենց ընտրությունն այսօր արժեք ունի երկրի համար և իրենց սերունդների համար ավելի մեծ նշանակություն է ունենալու, քան թե 10-15 հազարը, որ տալու են, հետո ձեռ առնեն ու ծաղրուծանակի ենթարկեն ընտրողներին»,- նշեց նա՝ հավելելով, որ մեծ է արժանապատվությունը վերականգնելու անհրաժեշտությունը:

Ռուստամյանը նաև ասաց, որ ՀՅԴ-ի ջանքերով կյանքի կոչված սահմանադրական բարեփխումները շատ խնդիրների լուծումներ են տալու: «Այսօր որևէ մեկը չի ունենալու ամբողջական իշխանություն, որն ունի նախագահը: Ո՛չ վարչապետը, ո՛չ ԱԺ նախագահը, ո՛չ էլ որևէ այլ պաշտոնյա ամբողջական իշխանություն չի ունենալու: Լինելու են երեք տարանջատված ճյուղեր՝ օրենսդիր, դատական և գործադիր, որոնցից յուրաքանչյուրն ինքնուրույն, անկախ որոշումներ է կայացնելու: Դատական իշխանությունն արմատական փոփոխություն է կրելու, լինելու է իսկապես անկախ: Համեմատելու համար ասեմ, որ այսօր մոտ 230 դատավոր ունենք, որոնց նշանակում և ազատում է նախագահը: Բա այդ 230 դատավորից ի՞նչ արդարադատություն ենք ակնկալում, բա պա՞րզ չէ, որ ինչ-որ հարց եղավ, պետք է անպայման Բաղրամյան 26-ից ստանան ինչ-որ ուղղություն»,- ասաց նա՝ հստակեցնելով, որ այս ամենն այլևս չի լինելու:

«Լինելու է տասը հոգանոց թիմ՝ բարձրագույն դատական խորհուրդ, հինգին ԱԺ-ն է ընտրելու՝ երեք հինգերորդով, և հինգին էլ` դատավորների ընդհանուր ժողովը: Տասն էլ իրար հավասար են լինելու, բոլոր որոշումները կայացվելու են քվեարկությամբ` տասը հոգու իմացությամբ և հավանությամբ: Մի բան է` մի հոգի որոշի, մի բան՝ տասը հոգի: Լրիվ այլ որակ է լինելու: Այս ամենը միջազգային փորձով անցած է: Մենք մեր ժողովրդին ներկայացնում ենք ծրագիր, որը ստուգված է, փորձարկված է, ոչ թե խոստումներ ենք տալիս, որոնք չգիտենք՝ ինչպես կատարել»,- ասաց Արմեն Ռուստամյանը:

Նրա խոսքով՝ ընտրակաշառքի մի ձևն էլ այն է, երբ մարդկանց խաբում են՝ ասելով, օրինակ, թոշակդ քիչ է, ես կգամ, երկու անգամ կավելացնեմ: «Ստացվում է` ավանսով ընտրակաշառք:  Պոպուլիզմի վատն էլ այն է, որ ոչ թե հանրային շահով ես առաջնորդվում, այլ դու մարդկանց քիմքին հաճելի բան ես ասում, որովհետև նրանց ձայնն է քեզ պետք»,- ասաց Ռուստամյանը՝ հավելելով. «Պետք է խոսել այն հիմքի վրա, որը  ինչ-որ քայլ կատարելու հնարավորություն է տալիս, իսկ մենք հավատում ենք, որ այսօրվա հնարավորությունը տալիս է ավելի լավ սոցիալական խնդիրներ լուծելու հնարավորություն, տնտեսությունն ավելի ազատականացնելու հնարավորություն, մոնոպոլիաները վերացնելու հնարավորություն»: