Ուրիխանյանը ներել է Անի Հովհաննիսյանին

Տիգրան Ուրիխանյանն ընդգրկվել է «Ծառուկյան» դաշինքի համամասնական  ցուցակում: Նա ցուցակի  7-րդ հորիզոնականում է:

Yerkir.am-ի հետ զրույցում Ուրիխանյանը «անհեթեթություն» որակեց մամուլում շրջանառվող այն լուրերը, թե Գագիկ Ծառուկյանը Ուրիխանյանին ասել է` կընդգրկի իր ցուցակում, եթե հետ վերցնի Analitik.am կայքի տնօրեն Անի Հովհաննիսյանի դեմ հայցը:

«Անհեթեթություն է, նման բան չի եղել: Ես ընդհանրապես հայց չեմ ներկայացրել Անի Հովհաննիսյանի դեմ: Ես հայց չունեմ, որ հետ վերցնեմ: Մեղադրանքը ներկայացրել է հատուկ քննչական ծառայությունը»,- ասաց նա:

Այնուհետև հայտարարեց, թե ներել է նրան Անի Հովհաննիսյանին, իսկ մնացած ամեն ինչը իրավապահ մարմինների գործն է:

Այլ հարցերի նա չցանկացավ պատասխանել:

Նշենք, որ Անի Հովհաննիսյանի դեմ հարուցված քրեական գործը ներկայումս քննվում է Կենտրոն և Նորք-Մարաշ վարչական շրջաններ ընդհանուր իրավասության դատարանում: Տիգրան Ուրիխանյանն այս գործով ներգրավված է որպես տուժող, սակայն այս գործով դատական նիստերին չի ներկայանում: Այսօրվա հերթական դատական նիստին պատգամավորը գրություն էր ուղարկել և հայտնել, որ ներել է ամբաստանյալին և չի ցանկանում հանդես գալ տուժող կողմի դիրքից: