ԿԲ-ն չի կարող ստիպել առևտրային բանկերին հիպոթեքային մատչելի տոկոսադրույքներ սահմանել. Ներսես Երիցյան

ԱԺ հերթական քառօրյա նիստում քննարկվում է «Բնակարանային հիպոթեքային կրեդիտավորման» մասին օրենքի փաթեթը: Հիմնական զեկուցող` ԿԲ նախագահի տեղակալ Ներսես Երիցյանը նշեց, որ օրենքների փաթեթը ուղղված է սպառողների շահերի պաշտպանությանը:

ՀՀԿ խմբակցության պատգամավոր Կարինե Աճեմյանը հարցրեց, թե արդյո՞ք հիպոթեքային վարկավորման տոկոսադրույքները համադրելի են, բարձր չեն` նկատի ունենալով երկրի սոցիալ-տնտեսական վիճակը, ցածր աշխատավարձերը: Երիցյանը նշեց, որ, համեմատած այլ զարգացած երկրների հետ, իհարկե, Հայաստանում տոկոսադրույքները բարձր են, բայց այնտեղ էլ են բնակիչները դժգոհ հիպոթեքային պայմաններից:

«Մեր հարևան երկրներում էլ տոկոսադրույքների մակարդակը նույնն է, եթե այնտեղ չկիրառվեն պետական ագրեսիվ դոտացիոն համակարգեր: Այնպիսի խնայողությունների մակարդակ, ինչպիսին մեզ մոտ է, եղած տոկոսադրույքները համադրելի են»,- ասաց նա:

Ներսես Երիցյանի համոզմամբ` այն ընտանիքները, որոնք ինչ-որ ձևով խնայում են, նրանց մոտ մեկից ավելի վարկ չի լինում կամ ընդհանրապես վարկ չի լինում: Բայց ընտանիքներ կան, որոնք վարկը վարկով են փակում, շատերը նույնիսկ չեն էլ հետաքրքրվում տոկոսադրույքով, ուղղակի վերցնում են այն վարկը, որն իր դուռն է գալիս, բայց արդյունքում ընկնում են պարտքերի տակ, որոնք բեռ են դառնում նրանց համար:

ՀՀԿ խմբակցության ղեկավար Վահրամ Բաղդասարյանը հարց ուներ` արդյո՞ք համարում է, որ տոկոսադրույքն արտոնյալ է, եթե այլ երկրներում տոկոսադրույքը մինչև 7 տոկոս է: «Չե՞ք պատրաստվում վերանայել այդ 12 տոկոս դրույքը, ունե՞ք այդ ազդեցությունը, այդ տոկոսադրույքը հասանելի՞ է քաղաքացիներին»,- հարցրեց պատգամավորը:

Ներսես Երիցյանը նշեց, որ դոլարային հիպոթեքները ցածր են, բացի այդ` պետությունը որոշ ծրագրեր է իրականացնում երիտասարդ ընտանիքների ու մասնագետների համար, որոնց տոկոսադրույքները ցածր են: Իսկ 12 տոկոսը, ըստ նրա, 10 տարվա ռիսկի համար, մեր երկրում տրամաբանական է: Երիցյանը հավելեց, որ մեզ մոտ ավանդներն են բարձր, իսկ այն երկրներում, որտեղ տոկոսադրույքները ցածր են, դեպոզիտը զրո տոկոս է:

Վահրամ Բաղդասարյանն արձագանքեց, որ պատասխանը համոզիչ չէր: Նա նշեց, որ ցուցակ ունի, որում ներգրավված են 10 երիտասարդ ընտանիքներ, որոնք սոցիալապես լավ վիճակում չեն գտնվում և ցանկանում են մատչելի տոկոսադրույքով հիպոթեքային բնակարան վերցնել:

«Պետք է հետևողական լինել, որ 6-7 տոկոսով վարկեր տան այդ երիտասարդ ընտանիքներին: Պատրա՞ստ եք բանկերի հետ աշխատել, որ ցածր տոկոսադրույքներով հիպոթեքային վարկ տան»,- հարցրեց Վահրամ Բաղդասարյանը:

Ներսես Երիցյանը նշեց, որ ԿԲ-ն իր քաղաքականությունն է իրականացնում` երաշխավորելով կայունություն, և ԿԲ-ն չունի ադմինիստրատիվ լծակներ, որ ստիպի բանկերին ցածր տոկոսներ տալ, քանի որ նման լիազորություն չունի: Նա խորհուրդ տվեց երիտասարդ ընտանիքներին, որ դիմեն համապատասխան հիմնադրամին` մասնակցելու պետական ծրագրերին: «Եթե ունեն վարկունակություն, ապա կարող են այդ վարկերից օգտվել»,- ասաց Երիցյանը: