Կառավարության որոշումը զգալիորեն խրախուսեց հիպոթեքային շուկան

Վարձու աշխատողների, անհատ ձեռնարկատերերի և նոտարների կողմից հիպոթեքային վարկի սպասարկման համար վճարված տոկոսների գումարների չափով եկամտային հարկի վերադարձման վերաբերյալ կառավարության որոշումը նպաստավոր էր և զգալիորեն խրախուսեց հիպոթեքային շուկան. այսօր լրագրողներին ասաց «Ակցեռն» անշարժ գույքի կոնցեռնի նախագահ Հակոբ Բաղդասարյանը:

«Եկամտահարկի ուղղորդումը հիպոթեքային վարկի մարմանը նպաստեց, որպեսզի բնակարանի կարիք ունեցող ընտանիքները տուն ձեռք բերելու ավելի վստահ որոշում կայացնեն»,- նշեց նա:

Բաղդասարյանի խոսքով` անշարժ գույքի հետ կապված վարկային ոլորտում պետք է արմատական փոփոխություն կատարվի` մեղմացման, մոտեցման ձևերի:

«Ազգային հիպոթեքային ընկերության» ՓԲԸ-ի գործադիր տնօրեն Հայկ Ոսկանյանը, ներկայացնելով կառավարության որոշումից հետո անշարժ գույք ձեռք բերելու, վերանորոգելու համար վերցված հիպոթեքային վարկերի վիճակագրությանը, նշեց, որ 2014-ից մինչև 2016-ի վերջին ամիսները ծրագրից, ընդհանուր առմամբ, օգտվել է 871 ֆիզիկական անձ: Նրա խոսքով` նույն ժամանակահատվածում վարձու աշխատողների, անհատ ձեռնարկատերերի և նոտարների կողմից վճարված եկամտային հարկից մոտ 700 մլն դրամի գումար է հետ վերադարձվել: Ոսկանյանը հույս հայտնեց, որ 2016-ի ցուցակում վերադարձված գումարներն ավելի մեծ ցուցանիշ կունենան: