Իսլանդիայում մեկնարկում է Եվրոպայի ամենագունագեղ փառատոներից մեկը

Փետրվարի 2-5-ը Ռեյկյավիկում անցկացվում է Իսլանդիայի ամենագունագեղ և հետաքրքրաշարժ փառատոնը, որը կրում է «Ձմեռային լույսեր» խորագիրը: 

Ինչպես ներկայացնում է Euromag-ը, փառատոնի ընթացքում մարդիկ քաղաքը զարդարում են տարատեսակ ծաղկեպսակներով ու զարդանախշերով, իսկ կենտրոնում գունագեղ լուսային շոու է իրականացվում:

Ի տարբերություն այլ եվրոպական լույսի տոների, «Ձմեռային լույսերը» պատմական ակունքներ ունեցող փառատոն է և անցկացվում է XVI-րդ դարից սկսած: Իհարկե, տարեցտարի փոխվում են տեխնոլոգիաները, և գիշերային Ռեյկյավիկը լազերային շոուների և ինստալիացիաների շնորհիվ էլ ավելի հետաքրքիր է դառնում:

Փետրվարի 2-ին լուսային շոուի մեկնարկը, ավանդույթի համաձայն, կտա Ռեյկյավիկի քաղաքապետը: Այսօր վերափոխվում և լուսավորվում է քաղաքի յուրաքանչյուր շենք և պատ:

Տոնակատարության անբաժան մասը Թանգարանների գիշերն է, որն անցկացվում է փետրվարի 3-ին: Յուրաքանչյուր թանգարան հատուկ գիշերային շոու ծրագիր, ցուցադրություն կամ համերգ է կազմակերպում: Փառատոնի երրորդ օրը լրացվում է լոգանքով ու պարերով: Քաղաքային լողավազաններն առաջարկում են լողալ տաք ջրում` ցրտաշունչ ձմեռային բաց երկնքի տակ: