Եթե վարչապետը շարունակի պաշտոնավարել, կմնամ նախարարի պաշտոնում. Վարդան Արամյան

Այսօր ֆինանսների նախարար Վարդան Արամյանը, լրագրողների հետ խոսելով պետական պարտքի սպասարկման մասին, նշեց, որ դրանում որևէ խնդիր, որևէ վտանգ չկա: Կա սպասարկման սցենարը, որը արտահայտված է բյուջեի նախագծում:

Նախարարը խոսեց նաև ներդրումների մասին` ասելով, որ բոլորը պետք է ներգրավվեն այդ գործում, քանի որ տարիներ շարունակ ներդրումները նվազել են, և այդ նվազումը պետք է կանգնեցնել:

Ըստ Արամյանի` ներդրումներ կարող են ներգրավվել մակրոտնտեսական կայունության,  վստահելի տնտեսության ու վստահելի բյուջե ունենալու պարագայում:

Ինչ վերաբերում է տնտեսական աճին, նախարարը նշեց, որ, իրենց կանխատեսմամբ, տնտեսական աճը կկազմի 3,2 տոկոս: Այս տարվա վերջին կիսամյակի համար կանխատեսել էին 2,2 տոկոս, սակայն սեպտեմբեր, հոկտեմբեր, նոյեմբեր ամսվա` գյուղատնտեսության ցուցանիշները ի չիք դարձրեցին 2,2 տոկոսի ակնկալիքը. գյուղատնտեսության ցուցանիշները նվազեցին արագ տեմպերով:

«Կայունացման տարի պետք է լինի,  շունչներս տեղը գա, որ կարողանանք թևակողել զարգացման տարի»,- ասաց նախարարը:

Հարցին, թե որտե՞ղ է իրեն տեսնում եկող տարի, Արամյանը պատասխանեց, որ եթե վարչապետը շարունակի պաշտոնավարել, ապա իրեն տեսնում է նույն` նախարարի պաշտոնում, իսկ վարչապետի մնալն էլ կախված է ընտրությունների արդյունքներից: