«Փոքր Մհեր»-ում պրոբլեմների թնջուկ կա. ԿԳ նախարար

Այսօր ՀՀ կրթության և գիտության նախարար Լևոն Մկրտչյանն ամփոփեց 2016 թվականի աշխատանքները:

Yerkir.am-ը հետաքրքվեց, թե ինչ քայլեր են իրականացվում «Փոքր Մհեր« կրթահամալիրում, քանի որ ավելի վաղ տեղեկացրել էինք, որ սաները բողոքում են տնօրենից` ասելով, որ նա վիրավորում է իրենց, արժանապատվությունը տրորում: Ի դեպ, այդ կապակցությամբ ծառայողական քննություն էր սկսվել կրթահամալիրում:

ԿԳ նախարարը պատասխանեց, որ իրականում խնդիրն ավելի բարդացավ, քան զուտ տնօրենի` պաշտոնում մնալ-չմնալն էր: «Փոքր Մհեր»-ում, որը, ըստ Մկրտչյանի, բավականին լավ գաղափար է, և որի սաները լավ արդյունքներ են տվել, կա պրոբլեմների թնջուկ: «Կան իրավական, տնտեսական և մանկավարժական խնդիրներ: Մեզ մտահոգեց, որ ինչ քրեական միջադեպ կա, «Փոքր Մհերի» շրջանավարտները մեջն են: Մենք բավական լուրջ ուսումնասիրություն ենք անցկացրել, քանի որ այնտեղ կա նաև լուրջ որակ և մանկավարժական կոլեկտիվ: Լուծումը տվել ենք արդեն` պաշտպանության նախարարության հետ, ուղղակի պետք է ձևաչափ ունենանք, որ կրթահամալիրի հիմնական դպրոցի կրթական ծրագիրն առանձնացնենք ու ավելի բացենք, որ աղջիկներ էլ սովորեն: Բացի այդ` փակության մեջ է խնդիրը, ինֆորմացիոն փակ շրջան է ստեղծվել, որը բերել է բացասական հետևանքների: Իսկ ավագ դպրոցը պետք է ՊՆ-ի ենթակայության ներքո լինի»,- ասաց Մկրտչյանը:

Նախարարը տեղեկացրեց նաև, որ արդեն իսկ առաջարկությունների փաթեթ են ներկայացրել  կառավարությանը: