Հանրապետականը մեկ լիդերի կուսակցություն է. Շարմազանով

ԱԺ փոխնախագահ Էդուարդ Շարմազանովն այսօր խորհրդարանում լրագրողների հետ զրույցում անդրադարձավ մամուլում հրատարակված այն լուրերին, թե Հովիկ Աբրահամյանը վերջին պահին է կարողացել համոզել Սերժ Սարգսյանին, որ ընտրվի ԳՄ անդամ, ու թեև ընդգրկվել է, լուսանցքում է մնալու:

Շարմազանովը նշեց, որ Հանրապետականի գործադիր մարմնի որևէ ներկայացուցիչ լուսանցքում չի կարող լինել և Հանրապետականի ղեկավար կազմի ներկայացուցիչ է:

«Հանրապետականը մեկ լիդերի կուսակցություն է, իսկ մնացածս իրականացնում ենք քաղաքականություն, որը բխում է լիդերի քաղաքականությունից: Ով ինչ պաշտոնում կլինի, դա ինձ համար երկրորդական է: Հիմա ես ԱԺ փոխնախագահ եմ, բայց հետո կարող եմ լինել սովորական գործազուրկ, դա չի նշանակում, որ ես կուսակցական ավելի ակտիվ գործունեություն չպետք է իրականացնեմ»,- ասաց նա` հավելելով, որ դրանք մամուլի հրապարակումներ են, ինքը նման տեղեկություններ չունի, և պետք չէ փնտրել սև կատու մութ սենյակում, մանավանդ, որ այն ուրիշ տեղում է:

Պնդմանը` նման բան ընդհանրապես չի՞ եղել, Շարմազանովը պատասխանեց, որ կարող է միայն ասել, որ գործադիր մարմնի նիստում նման հարց չի քննարկվել երեկ, և ներկայացրել են 21 հոգանոց ցուցակ, որը համագումարը հավանության է արժանացրել: