ԱԺ-ում կարող է սահմանափակվել հարցուպատասխանի, արձագանքի տևողությունը

Այսօր ԱԺ արտահերթ նիստում սկսվեց «ԱԺ կանոնակարգ» նոր օրենքի նախագծի քննարկումը: Հիմնական զեկուցող` ԱԺ պետաիրավական հանձնաժողովի նախագահ Հովհաննես Սահակյանը ներկայացրեց նոր օրենքը, նորամուծությունները: Նա նախ նշեց, որ օրինագծի հիմքում դրվել են բացառապես նոր Սահմանադրության դրույթները:

Նորամուծություն է ԱԺ քննիչ հանձնաժողովը, որն ընդդիմության կարևոր գործիքակազմերից է դառնում: Պատգամավորների մեկ քառորդի պահանջով է այն ձևավորվում: Դա այն հարթակն է, որտեղ քննարկվում են հանրությանը հետաքրքրող հարցերը: Այդ հանձնաժողովը կարող է պահանջել լիարժեք տեղեկատվություն, իր նիստերին հրավիրել համապատասխան պաշտոնատար անձանց, կազմվում է զեկույց, որն ուղարկվում է համապատասխան անձանց, նրանք էլ պարտավոր են արձագանքել այդ զեկույցին: Եթե լինեն հարցեր, որ առերևույթ հանցակազմ կպարունակեն, հանձնաժողովի անդամներն ազատ են իրավապահ մարմինների հետ դա քննարկել:

Խմբակցությունների գրավոր հարցապնդումները նույնպես կարող են դառնալ ընդդիմադիրների գործիքակազմ, քանի որ նրանք կարող են դիմել կառավարությանը, և 30 օրվա ընթացքում կառավարությունը պետք է ներկայացնի պարզաբանումներ, որից հետո սկսվում են քննարկումներ այդ հարցապնդման վերաբերյալ: Այստեղ կարող է դրվել նաև որևէ պաշտոնյայի կամ վարչապետի անվստահության հայտնելու հարցը:

Սահակյանը հայտնեց, որ սահմանափակվում է հարցուպատասխանի տևողությունը, ելույթները, արձագանքները, սակայն առաջարկներ լսելուց հետո կարող են նաև փոփոխել տևողույունը: «Հարցուպատասխանի տևողության կրճատումը նախատեսել ենք աշխատանքների արդյունավետ կազմակերպման նպատակով, որովհետև լինում են ելույթներ, որ մտավարժանքի են նմանվում»,- ասաց նա: