Թուրքիայում քրդամետ կուսակցության 11 անդամ է ձերբակալվել, այդ թվում՝ համանախագահները

Թուրքիայում ձերբակալել են քրդամետ Ժողովուրդների դեմոկրատական կուսակցության 11 անդամի:

Ըստ Demokrathaber-ի՝ ձերբակալվածների թվում են կուսակցության համանախագահներ Սելահաթթին Դեմիրթաշն ու Ֆիգեն Յուքսեքդաղը:

Ձերբակալությունների մասին իր ֆեյսբուքյան էջում բարձրաձայնել է Դեմիրթաշը: «Անվտանգության աշխատակիցները Դիարբեքիրի իմ տան դռան առջև են՝ բռնի ձերբակալման հրամանով»,- գրել է նա:

Կուսակցության ձերբակալված անդամներն են` Սելահաթթին Դեմիրթաշը, Ֆիգեն Յուքսեքդաղը, Իդրիս Բալուքենը, Նուրսել Այդողանը, Սըրրը Սյուրեյյա Օնդերը, Ֆերհաթ Էնջուն, Սելմա Ըրմաքը, Գյուլսեր Յըլդըրըմը, Զիյա Փիրը, Աբդուլլահ Զեյդանն ու Լեյլա Բիրլիքը:  

Ձերբակալման ենթակա պատգամավորներ են նաև Ֆայսալ Սարըյըլդըզը և Թուղբա Հեզեր Օզթյուրքը, որոնք երկրից դուրս գտնվելու պատճառով դեռևս չեն ձերբակալվել:

Երկրի ներքին գործերի նախարարությունը հաստատել է ընդդիմադիր 11 պատգամավորի ձերբակալության մասին լուրը: