Հայաստանում առաջին անգամ անցկացվել է ժողովրդական նվագարանների համույթների հանրապետական մրցույթ-փառատոն

Կառավարությունը 2006 թ.-ին ծրագիր է ներկայացրել Ազգային ժողովի հաստատմանը, ըստ որի` բոլոր երաժշտական դպրոցներում ազգային նվագարաններով ուսուցումը պետք է լինի պետպատվերով, այսինքն` անվճար: «Սա, իհարկե, շատ ճշմարիտ և գեղեցիկ նպատակ էր, որ իրագործվեց և տվեց իր պտուղները: Արդյունքում` այսօր բոլոր մարզերում ունենք նվագախմբեր, և 2016 թ. սեպտեմբեր-հոկտեմբեր ամիսներին առաջին անգամ կազմակերպվեց  ժողովրդական նվագարանների անսամբլների հանրապետական մրցույթ-փառատոն, որը նվիրված է  ՀՀ անկախության 25-ամյակին»,- լրագրողներին ասաց ՀՀ ժողովրդական արտիստ Թովմաս Պողոսյանը:

Մրցույթ-փառատոնի հիմնադիրն է  ՀՀ կրթության և գիտության նախարարությունը, կազմակերպիչներն են Հայաստանի երաժշտական ընկերությունն և  ՀՀ կրթության և գիտության նախարարության գեղարվեստական դաստիարակության և մշակույթի կենտրոնը: Մրցույթ-փառատոնի անցկացման նպատակն է ազգային նվագարանների համույթների կատարողական վարպետության բարձրացումը, մշակութային կապերի ամրապնդումը, ինչպես նաև այս ժանրի ժողովրդայնացումը:

Ըստ Պողոսյանի` առաջին և երկրորդ փուլերն արդեն կայացել են, մասնակցել են Հայաստանի և Արցախի ժողովրդական նվագարանների անսամբլներ:

«Մրցույթի գալա-համերգը և մրցանակաբաշխությունը տեղի կունենան Ա.Խաչատրյանի անվան համերգասրահում»,- հավելեց  նա: