Բարեփոխումները պետք է սկսենք հենց կառավարությունից. վարչապետը խոսեց կոռուպցիայի մասին

Այսօր ԱԺ արտահերթ նիստում քննարկվում է նոր կառավարության ծրագիրը: Այն ներկայացնում  է վարչապետ Կարեն Կարապետյանը:

Խոսելով առաջնահերթությունների մասին` վարչապետն անդրադարձավ փոփոխված Սահմանադրության կյանքի կոչման կարևորությանը: Ըստ նրա` հետևողականորեն պետք է կյանքի կոչվեն ժողովրդավարական ինստիտուտների հետագա զարգացումն ապահովող միջոցառումները: Առանց քաղաքական ինստիտուտների նկատմամբ քաղաքացիների վստահության ավելացման, ըստ վարչապետի, հնարավոր չէ ստեղծել արդար ու մրցակցային միջավայր, հնարավոր չէ ապահովել լավատեսություն ապագայի նկատմամբ:

Կարապետյանը կարևորեց նաև միջին խավ ձևավորելու ու այն պահպանելու հարցը:

«Բարեփոխումները պետք է սկսենք հենց կառավարությունից: Մենք պետք է նոր շունչ հաղորդենք պետական կառավարման և տեղական ինքնակառավարման համակարգերին`դրանք դարձնելով ժամանակակից, ճկուն և արդյունավետ: Այդ համակարգերը ասես սանիտարական մաքրման ենթարկելով` պետք է հասնենք նրան, որ նվազագույն ծախսերով ապահովենք առավելագույն արդյունք: Պետական կառավարման արդյունավետության առաջին նախապայմանը կոռուպցիայից զերծ լինելն է, սրա մասին շատ է խոսվում: Վստահ եմ, որ հասարակությունը կզգա համապատասխան ազդակները»,- ասաց վարչապետը:

ՏԻՄ մակարդակում կոռուպցիան նվազեցնելու նպատակով խթանելու են պետություն-մասնավոր հատված համագործակցությունը: