Ի՞նչ կենսագրություն ունի պաշտպանության նորանշանակ նախարարը

Հայտնել ենք, որ Սերժ Սարգսյանի` այսօր ստորագրած հրամանագրով Վիգեն Սարգսյանը նշանակվել է ՀՀ պաշտպանության նախարար:

Վիգեն Ալեքսանդրի Սարգսյանը ծնվել է 1975 թվականի մայիսի 10-ին:

1992-1996 թթ. սովորել և ավարտել է ՌԴ Սանկտ Պետերբուրգի Քաղաքացիական ծառայության հյուսիսարևմտյան ակադեմիան՝ «Պետական կառավարում և տեղական ինքնակառավարում» մասնագիտությամբ, «անձնակազմի կառավարում» մասնագիտացմամբ։

1992-1999 թթ. սովորել և ավարտել է Երևանի պետական համալսարանի միջազգային հարաբերությունների ֆակոլտետը և մագիստրատուրևան՝ «Դիվանագիտության պատմություն և միջազգային հարաբերություններ» մասնագիտությամբ։

1998-2000 թթ. սովորել և ավարտել է ԱՄՆ Մասաչուսեթս նահանգի Մեդֆորդի Թաֆթս և Հարվարդի համալսարանների Իրավունքի և դիվանագիտության Ֆլետչեր դպրոցը՝ Իրավունքի և դիվանագիտության արվեստների մագիստրոսի կոչմամբ։

1995 թ. հոկտեմբերից–1998 թ. օգոստոս` ՀՀ Ազգային ժողովի նախագահի օգնական, ապա խորհրդական։

2000–2003 թթ.` ծառայություն է անցել ՀՀ զինված ուժերում, ՀՀ պաշտպանության նախարարի ռեֆերենտ։

2001– 2011 թթ.` Հայաստանի ամերիկյան համալսարանի հրավիրված դասախոս։

2003 թ. մարտ–2009 թ. հունվար` ՀՀ Նախագահի օգնական։ 2009 թ. հունվարի 27-ին ՀՀ Նախագահի հրամանագրով նշանակվել է Հայաստանի Հանրապետության նախագահի աշխատակազմի ղեկավարի տեղակալ:

2011 թ. հոկտեմբերի 17-ից ՀՀ նախագահի հրամանագրով նշանակվել է Հայաստանի Հանրապետության նախագահի աշխատակազմի ղեկավար:

Վիգեն Սարգսյանը պարգևատրվել է Հայաստանի Հանրապետության պաշտպանության նախարարության «Անդրանիկ Օզանյան» մեդալով (2008), Մովսես Խորենացու մեդալով (2007), «Հայրենիքին մատուցած ծառայությունների համար» 1-ին (2015) և 2-րդ աստիճանի (2013) մեդալներով:

Ամուսնացած է, ունի երեք դուստր: