Մի շարք օրենքներ կհամապատասխանեցվեն նոր Սահմանադրությանը

Այսօր կառավարության նիստում արդադարտության նախարարի տեղակալ Սուրեն Քրմոյանը ներկայացրեց «Տեղական ինքնակառավարման մասին», «Տեղական հանրաքվեի մասին», «Հանրակրթության մասին», «Հայաստանի Հանրապետության բյուջետային համակարգի մասին» օրենքների նախագծերի փաթեթում փոփոխություններ կատարելու հարցը:

Նրա խոսքով՝ 2015 թ. ընդունված նոր Սահմանադրությամբ է պայմանավորվում սույն օրենքի նախագծի ընդունումը, քանի որ անհրաժեշտություն կա օրենքի դրույթները համապատասխանեցնելու ոչ միայն նոր Սահմանադրությանը, այլ նաև միջազգային փաստաթղթերին ու միջազգային ակտերին:

«Նոր Սահմանադրությունն առիթ է հանդիսացել, որ արդիականացվի տեղական ինքակառավարման մասին օրենքը»,- ասաց փոխնախարարը:

Վարչապետ Հովիկ Աբրահամյանը նշեց, որ, քանի որ նախագծով նաև լիազորությունների փոփոխություններ են նախատեսվում, հարկավոր է նախագահի աշխատակազմի հետ ևս քննարկել և ընդհանուր հայտարարի գալ: Նա տասը օր ժամանակ տրամադրեց և հորդորեց շահագրգիռ կազմակերպություններին առաջարկություններ ներկայացնել:

Նոր օրենքի նախագծով առաջարկվում է՝

• Տեղական ինքնակառավարման, համայնքի և նրա բնակիչների նոր հասկացությունների սահմանում՝ ՀՀ Սահմանադրության համապատասխան.

• Տեղական ինքնակառավարման հիմնարար սկզբունքների համապատասխանեցում Եվրոպական Խարտիայի պահանջներին և միջազգային փորձին.

• Տեղական ինքնակառավարման մարմինների լիազորությունների և համայնքի խնդիրների ընդհանուր բնութագրի ընդհանրական սահմանում.

• Համայնքի պարտադիր խնդիրների օրենքով սահմանում՝ ՀՀ Սահմանադրության 86-րդ հոդվածին համապատասխանեցմամբ.

• Բնակիչների մասնակցությունը տեղական ինքնակառավարման գործընթացներին խմբագրում. մասնավորապես՝ 1)տեղական ինքնառավարմանը քաղաքացիական նախաձեռնությունների միջոցով մասնակցելու հնարավորությունը, 2)տեղական ինքնակառավարման մարմինների գործունեության հրապարակայնության բարելավումը, օրինակ համայնքի ինտերնետային կայք ունենալու պահանջի ներդրմամբ:

• Նախագիծը տալիս է տեղական ինքնակառավարմանը բնակչության մասնակցության, այդ թվում` հանրային քննարկումներ անցկացնելու որոշակի չափանիշներ ու սահմաններ, որոնց մանրամասն ընթացակարգերը սահմանելու է համայնքի ավագանին:

• 3000 և ավելի բնակիչ ունեցող համայնքների համար սահմանվել է պարտադիր ինտերնետային պաշտոնական կայք ունենալու պարտավորություն.

• Համայնքի ավագանու ինստիտուտի և նրա գործունեության հետ կապված լրացուցիչ հստակեցումներ և լրացումներ, ինչպես նաև այլ դրույթներ: