Սեֆիլյանի կալանքից մինչեւ Արթիկի հեղեղ. ԱԺ արտահերթ նիստը մեկնարկեց

Այսօր խորհրդարանը սկսեց արտահերթ նիստը, որը հրավիրվել է կառավարության առաջարկությամբ: Օրակարգում են ԸՕ-ում փոփոխություններ կատարելու և ՀՕՊ համաձայնագիրը վավերացնելու հարցերը:

Վարման կարգով ելույթ ունեցան ՀԱԿ պատգամավոր Նիկոլ Փաշինյանն ու «Ժառանգություն» խմբակցության ղեկավար Զարուհի Փոստանջյանը, ովքեր բարձրացրեցին Ժիրայր Սեֆիլյանին կալանքից ազատելու մասին հարցը:

ԱԺ նախագահ Գալուստ Սահակյանը դիտողություն արեց` ասելով, որ բարձրացված հարցն առնչություն չունի օրակարգի հետ:

ՀՀԿ-ական Սամվել Ֆարմանյանն էլ բարձրաձայնեց Արթիկում ջրհեղեղի հետևանքների մասին` ասելով, որ թեև կառավարության անդամները եղել են Արթիկում և հայտարարել, որ կառավարությունը կփոխհատուցի վնասները, սակայն բնակչության շրջանում շարունակվում է անորոշությունը, թե այդ օժանդակությունը ե՞րբ է տրվելու և ի՞նչ ժամկետի համար: Ֆարմանյանը խնդրեց Գալուստ Սահակյանին խոսել կառավարության հետ և պարզել այդ հարցերը:

Գալուստ Սահակյանը խոստացավ խոսել կառավարության հետ: