Սոցիալական խնդիրների պատճառով շատ տղամարդիկ ուղղակի չեն ամուսնանում

Վաղն ընտանիքի միջազգային օրն է: Այսօր` լրագրողների հետ հանդիպման ժամանակ, հոգեբան Սամվել Խուդոյանը նշեց, որ եթե նայենք տարիների խորքից, հայ հասարակության մեջ շատ բան է փոխվել:

Առաջին խնդիրը, ըստ նրա, սոցիալականն է, որի պատճառով շատ տղամարդիկ ուղղակի չեն ամուսնանում, իսկ ամուսնացածները երեխա չեն ունենում: Նախկինում, ըստ հոգեբանի, եթե յուրաքանչյուր ընտանիքում գոնե 2 երեխա էր ծնվում, հիմա այդ թիվը հասել է մեկի, ընդ որում` մեկ երեխայի դեպքում էլ են սոցիալական բազում խնդիրներ փորձում հաղթահարել ամուսինները: Բազմազավակ ընտանիքներ, Խուդոյանի հավաստմամբ, հիմա կարելի է հանդիպել միայն գյուղերում:

«Բացի այդ` եվրոպական չափանիշները նվազեցնում են ընտանիքների թիվը: Հայաստանում ընտանիքի տարիքը մեծացել է, և հիմա նորմալ է համարվում 30-40 տարեկանում ամուսնանալը: Սա ես դրական երևույթ եմ համարում, քանի որ հասուն մարդկանց միությունն ավելի կայուն է լինում, և այդ տարիքում ընտանիք կազմողները հազվադեպ են ամուսնալուծության գնում»,- ասաց հոգեբանը:

Ըստ նրա` ավելացել է նաև տարիքային ահռելի տարբերությամբ ամուսնությունների թիվը, ինչպես նաև տղամարդկանց թիվը, որոնք մեկից ավելի «ընտանիք» են ունենում: Պատճառը, ըստ Խուդոյանի, այն է, որ տղամարդկանց թիվը նվազել է` պատերազմների և արտագնա աշխատանքի մեկնելու հետ կապված: