Թուրքիայում քննարկվում է Դավութօղլուի հրաժարականի հարցը

Թուրքիայում թեժանում են նախագահ Ռեջեփ Թայիփ Էրդողանի և վարչապետ Ահմեդ Դավութօղլուի միջև տարաձայնությունների և վարչապետի հնարավոր հրաժարականի մասին քննարկումները:

Երեկ նախագահական նստավայրում նախատեսվածից մեկ օր շուտ կայացած` Էրդողան-Դավութօղլու հանդիպման օրակարգում, ըստ թուրքական ԶԼՄ-ների, Դավութօղլուի հրաժարականի հարցն է եղել:

Այս քննարկումների թեժացման շարժառիթ է դարձել օրերս իշխող «Արդարություն և զարգացում» կուսակցության նիստում Դավութօղլուի ելույթը, որի ընթացքում նա հայտարարել էր, որ «եթե կա մի պաշտոն, որից հասարակ մահկանացուն երբեք չի հրաժարվի, ապա ինքն անտարբերությամբ այդ պաշտոնը կթողնի»:

Ի դեպ, երեկ նախագահական նստավայրում տեղի ունեցած հանդիպումը տևել է մոտ 1 ժամ 40 րոպե, սակայն հանդիպումից հետո նախագահականի մամուլի ծառայությունից պաշտոնապես հայտարարվեց, որ հանդիպման վերաբերյալ որևէ հայտարարություն չի լինելու: