125 վիրավոր. 5-ի վիճակը ծայրահեղ ծանր է

Այս պահի դրությամբ` հակառակորդի նախահարձակ գործողությունների հետևանքով ունենք 125 վիրավոր, որոնցից 45-ը բուժում է ստանում Կենտրոնական զինվորական հոսպիտալում. լրագրողների հետ հանդիպման ժամանակ ասաց ԶՈՒ ռազմաբժշկական վարչության պետի տեղակալ Հարություն Գալստյանը: Ըստ նրա` վիրավորների մեծ մասն ունի բեկորային վնասվածքներ, ոմանց մոտ կան բազմաբեկորային վնասվածքներ:

«Այս ընթացքում դուրս է գրվել 3 վիրավոր: Հինգի մոտ, որոնց վիճակը ծայրահեղ ծանր է, դեռևս փոփոխություններ չկան` ո'չ դրական, ո'չ բացասական: Նրանցից մեկը գլխի շրջանում է վիրավորում ստացել: Ծայրահեղ ծանր վիճակում գտնվող վիրավորներից մեկը օրերս է վիրավորում ստացել: Ինչ վերաբերում է վիրավորների` արտերկրում բուժում ստանալն ապահովելուն, ապա հարցը քննարկվում է, և անհրաժեշտության դեպքում նրանց կտեղափոխենք»,- ասաց Գալստյանը:

Նա հավաստիացրեց, որ վիրավորների մոտ կա դրական տեղաշարժ. հաղթող զինվորի մոտ վերքերը, սովորաբար, ավելի շուտ են լավանում: