Մենք տեղյակ ենք եղել, որ հակառակորդն ինչ-որ բան է նախապատրաստում. Բակո Սահակյան

ԼՂՀ ՊԲ տեղեկատվական  կենտրոնում այսօր ասուլիս տվեց ԼՂՀ նախագահ  Բակո Սահակյանը:  ԼՂՀ նախագահը նախ ներկայացրեց կոնֆլիկտի արմատները:

«Ես չեմ համաձայնում նրանց հետ, ովքեր այս կոնֆլիկտը որակում են որպես տարածքային հարց: Այս կոնֆլիկտը Առաջին աշխարհամարտի տարիներին է ծագել, երբ մեր ժողովուրդը նաեւ այլ ողբերգություն ապրեց, երբ Օսմանյան կայսրությունը կոտորեց 1.5 մլն հայերին: Դրանից հետո մեր հայրենիքը կիսվեց, 1921 թվականին մեր հայրենիքի մի մասը ուրիշ պետության բռնակցվեց, մի պետության, որ հենց այդ ժամանակ էլ ստեղծվեց:

Մինչեւ 88-ի շարժումը հայկական ժողովուրդը երբեք չի հաշտվել այդ իրողության հետ եւ տարբեր քայլեր է ձեռնարկել, սակայն դրանք հաջողությամբ  չեն պսակվել:

Արցախյան շարժման շնորհիվ մենք ազատվեցինք այդ գերությունից եւ կառուցեցինք մեր երկիրը համամարդկային արժեքներին համահունչ եւ մեր նպատակը եղել է կառուցել ժողովրդավար պետություն: Եւ մեր ձեռքբերումները այս առումով գնահատել են տարբեր ներկայացուցիչներ, միջազգային հանրության  տարբեր պատվիրակություններ: Բայց այդ հաջողություններին հասել ենք, մի ձեռքով զենք բռնած»,- ասաց Բակո Սահակյանը:

Լրագրողների խնդրանքով  ԼՂՀ նախագահը նաեւ ներկայացրեց իրավիճակի սրացման օրը իրենց գործողությունները:

«Այդ օրը մենք, գտնվելով  իմ աշխատասենյակում մինչեւ գիշերվա ժամը  մեկը, քանի որ տեղյակ էինք, որ հակառակորդի կողմից ինչ-որ շարժ կա,այդ ժամանակ ես հրավիրեցի խորհրդակցության ՊԲ ղեկավարին, ԱԱԾ ղեկավարին եւ քննարկեցինք այդ տեղաշարժը:

Քանի որ այս վերջին ժամանակներս գտնվում էինք ինտենսիվ կրակի տակ` հակառակորդի կողմից, մենք այդ գործողությունն ընկալել ենք որպես հերթական զարգացում եւ մեր գործողությունները այդ առումով ենք դասավորել` ենթադրելով, որ գործողությունները լոկալ բնութ են կրելու:

Եւ մենք ցտեսություն ենք հայտնել եւ մեկնել ենք հանգստանալու:

ՊԲ հրամանատարը այնուամենայնիվ մեկնել է իր աշխատասենյակ եւ սկսել է լրացուցիչ  ուսումնասիրություն անել: Եւ հակառակորդը գիշերը ժամը երեքին սկսել է լայնածավալ գործողությունները`հնարավորություն չտալով մեզ` գնահատելու իրավիճակը: Այն պահից, երբ ես հայտնվել եմ ՊԲ հրամանատարության կողքին` ծանոթանալով ստեղծված իրավիճակին` տվել եմ համապատասխան կարգադրություններ»: