Մենք վստահում ենք Հայաստանին, բայց առանց Ղարաբաղի ոչ մի բանակցություն չի կարող հաջողության հասնել. Բակո Սահակյան

ԼՂՀ ՊԲ-ում Արցախի նախագահ Բակո Սահակյանը ասուլիսի ժամանակ  անդրադարձավ Մինսկի խմբի առաքելության  արդյունավետությանն ու բանակացությունների  ձեւաչափին: «Ես բազմիցս հնարավորություն   եմ ունեցել` գնահատական տալու Մինսկի խմբի համանախագահների աշխատանքին, ոչ միայն գնահատական եմ տվել,այլ նաեւ շնորհակալություն եմ հայտնել ջանքերի համար, գտնում եմ, որ հարաբերական խաղաղությունը մինչեւ ապրիլի մեկի գիշերը ապահովվում էր համանախագահների շնորհիվ:  Ես նաեւ  հանդիպումների ընթացքում ներկայացնում էի մեր դժգոհությունները` նրանց կողմից իրականացվող աշխատանքներին: Բոլոր հանդիպումների ժամանակ ես բարձրաձայնում էի, որ խանգարված ձեւաչափի պայմաններում անհնար է հասնել հարցի վերջնական լուծման: Ցանկացած առաջարկ, նախաձեռնություն, քանի դեռ չի իրականացվում ԼՂՀ պաշտոնական մասնակցությամբ, չի կարող հաջողության հասնել:

1994 թվականի հրադադարի համաձայնագրով ԼՂ-ն բանակցող կողմ է եւ այդ փաստաթուղթը ուժը չի կորցրել: Այս վերջին իրադարձությունները հիմք կհանդիսանան միջազգային հանրության համար  վերանայել բանակցությունների ձեւաչափը` Արցախին դարձնելով բանակցային լիարժեք կողմ»,- ասաց Բակո Սահակյանը:

Լրագրողի հարցին` արդյոք Հայաստանը բավավար չափով չի պաշտպանում Արցախի շահերը` բանակցային գործընթացքում` ԼՂՀ նախագահը պատասխանեց. «Դա կապված չի Հայաստանի նկատմամբ մեր անվստահությամբ` բանակցային գործընթացում մեր շահերը պաշտպանելու առումով, երբ  հանդես ենք գալիս որպես կողն հանդես գալու առաջարկով եւ ԼՂՀ ԱԺ-ն օրենսդրորեն ամրագրել է, որ  ՀՀ-ն Արցախի անվտանգության երաշխավորն է: Սակայն աշխարհում նման բան չկա, որ որեւէ հակամարտություն քննարկվի առանց կոնֆլիկտի անմիջական կողմի:  Եւ իմիջիայլոց կոնֆլիկտը նախապես երկու կողմի միջեւ է եղել, հետո Ադրբեջանը կարողացավ ներգրավել  Հայաստանին` որպես կողմ»: