25 տարի հետո Հայաստանում տղաներն իրենց զույգին գտնելու դժվարության առաջ են կանգնելու

Այսօր` լրագրողների հետ հանդիպման ժամանակ, ՄԱԿ-ի Բնակչության հիմնադրամի հայաստանյան գրասենյակի գործադիր տնօրեն Գարիկ Հայրապետյանն անդրադարձավ Հայաստանում կնոջ դերին առնչվող խնդիրներին: Նրա խոսքով՝ ներկայումս հայ հասարակության մեջ կիննը ավելի քիչ արժեք ունի, և դրա մասին է խոսում այն ցուցանիշը, որ Հայաստանը 3-րդ տեղում է` աշխարհում աղջիկ երեխա չցանկանալու առումով, այսինքն` երեխայի սեռով պայմանավորված հղիության ընդհատումներով:

«Այս բոլոր խնդիների համակցությունը բերելու է նրան, որ սոցիալական բալանսը խախտվելու է: Այսօր երեխայի սեռով պայմանավորված` հղիության ընդհատման արդյունքում ունենք 50 հազար ավելի ծնված տղա, որոնք դժվարություններ են ունենալու ապագայում՝ իրենց զույգին ընտրելու առումով: Եվ գուցե 20-25 տարի հետո միայնակ տղաների խնդրի առաջ ենք կանգնելու, որովհետև նրանք չեն կարողանալու ընտանիք կազմել»,- ասաց Գարիկ Հայրապետյանը: